Ճարպի համը համարվում է եզակի և պետք է դառնա հիմնական համերի ցուցակում վեցերորդը` քաղցր, դառը, թթու, աղի և ումամի համերից հետո: Նոր համը, որ գիտնականները անվանել են օլեոգուստուս, մաքուր վիճակում մարդկանց կողմից ընկալվում է որպես տհաճ և անուտելի: Այդ թեմայով հետազոտությունները ներկայացված են Chemical Senses ամսագրում, ինչի մասին հայտնում է The Independent-ը:
Ամերիկացի գիտնականները փորձել են պարզել, թե ինչ համ ունեն ճարպաթթուները, որոնցից հիմնականում գոյանում են ճարպերը: Կամավորների քիթը փակել են, որպեսզի հոտ չզգան, և առաջարկել տարբեր նյութերի համը փորձել, ապա դասավորել ըստ նմանության: Փորձի մասնակիցները ճարպաթթուների համը որակել են որպես հատուկ, բոլորից տարբերվող համ: Շատերը այն անվանել են դառը և տհաճ:
Նոր հայտնագործությունը կօգնի մշակել ճարպերի փոխարինիչներ, իսկ ներկայումս նմանատիպ մթերքները վերարտադրում են միայն ըստ ճարպերի կառուցվածքի, այլ ոչ ըստ համի:
