Հռոմեական կայսրության ժամանակների ամֆիթատրոնում, որի ավերակները հայտնաբերվել են 1980-ականներին՝ Լոնդոնում, ավելի քան 1500 տարի հետո թատերական ներկայացում կբեմադրվի։ Այս մասին հաղորդում է The Daily Telegraph-ը:
Ինչպես տեղեկացնում է London Evening Standard-ը, բեմադրության հեղինակն է Սոֆի Ռիչարդսը, ով աշխատում է Գիլդհոլի գեղարվեստական թանգարանում, որի տարածքում էլ գտնվում են ամֆիթատրոնի ավերակները:
Պիեսի սյուժեի հիմքում հին հունական ողբերգություն է՝ Եվրիպիդեսի «Մեդեա»-ն։
Ռեժիսորը խոստացել է վերականգնել հին բեմադրությունների դետալները, օրինակ՝ ամբողջությամբ ներգրավել տղամարդկանց դերասանական կազմն ու երգչախումբը:
Ամֆիթատրոնի կառուցումը վերագրվում է մ.թ. 70 թ., երբ Հռոմեական կայսրությունը Բրիտանիայի մեծ մասը գրավեց կելտական ցեղերից:
Ամֆիթատրոնը տեղավորել է շուրջ 5000 հանդիսատեսի ու ծառայել է ոչ թե ներկայացումներ, այլ գլադիատորական մարտեր դիտելու համար:
