«Ժառանգություն» կուսակցության և ոստիկանության միջև կառավարության շենքի առջև տեղի ունեցած միջադեպի կապակցությամբ հատուկ քննչական մարմնից հարցաքննության են հրավիրվել կուսակցության անդամներ Զարուհի Փոստանջյանն ու Արմեն Մարտիրոսյանը:
Փոստանջյանը տեղեկացրեց, որ սկզբից իրենք հրաժարվել են ներկայանալ, քանզի ծանուցագրի մեջ իրենց կարգավիճակը չեն նշել, երկրորդ անգամ պատշաճ կերպով կազմված ծանուցագիր են ուղարկել, համաձայն որի` պատգամավորները գործով անցնում են որպես վկաներ:
Փոստանջյանը նշեց, որ ինքը վկայություն չի տվել, քանզի ինքը հաղորդում է ներկայացրել հանցագործության մասին, սակայն մինչ այժմ տեղյակ չէ դրա ճակատագրից:
«Դրանից հետո ես ստացա մի գրություն, որտեղ նշվում է, որ իմ հաղորդումը կցվել է մի գործի, համաձայն որի` Հանրապետության հրապարակում տեղի է ունեցել միջադեպ ոստիկանության մի աշխատակցի նկատմամբ: ՔԴ օրենսգրքով նման գործառույթ, երբ հաղորդումն ինչ-որ գործի է կցվում, գոյություն չունի: Հետևաբար այս քննիչը անգործություն է դրսևորել»,- մանրամասնեց Փոստանջյանը և հավելեց, որ քննիչի գործողությունները բողոքարկվելու են Աղվան Հովսեփյանին.
«Եթե նա չպատասխանի կամ պատասխանն ինձ չբավարարի, կդիմենք դատարան, դատական կարգով կվիճարկենք, կուղարկենք Մարդու իրավունքների եվրոպական դատարան»:
Ժառանգական պատգամավորը ընդգծեց, որ այս գործը ներկայացվել է նաև ԵԽ Մարդու իրավունքների հանձնակատարին, ինչպես նաև տարբեր միջազգային իրավապաշտպան կազմակերպությունների:
