2012թ. Ռուսաստանի նախագահական ընտրությունների համատեքստում Մեդվեդևի և Պուտինի միջև հարաբերությունները լարվել են:
Մոսկվայի պետական համալսարանի պատմության ֆակուլտետի դեկանի տեղակալ, Trend-ի փորձագետների խորհրդի անդամ Ալեքսեյ Վլասովը «Առաջին լրատվականի» հետ զրույցում նշեց, որ ընդհանուր առմամբ Ռուսաստանի դիրքորոշումը Հայաստանի ներկայիս իշխանությունների քաղաքական հավասարակշռության ապահովման համար պակաս կարևոր հանգամանք չէ: Ռուսաստանի էլիտան որքան շատ զբաղված լինի 2012թ. ընտրությունների հարցերով, այնքան քիչ ստիպված կլինի ուշադրություն դարձնել Ռուսաստանից դուրս կատարվող իրադարձություններին:
«Անկասկած, Հայաստանի ներկայիս իշխանությունների համար դժվար կլինի իրականացնել ներքաղաքական այն կուրսը, որը կա այսօր: Այստեղ շատ վտանգներ, մարտահրավերներ կան, տնտեսական և սոցիալական խնդիրներ, որոնք կարող են լուծվել միայն Ռուսաստանի ակտիվ ներգրավվածության շնորհիվ»,- նկատեց Վլասովը և հավելեց, որ խնդիրն այն չէ, թե 2012թ. ով կլինի Ռուսաստանի նախագահը` Պուտինը, թե Մեդվեդևը, այլ այն, թե չի՞ փոխվի արդյոք Հայաստանի դերը Ռուսաստանի էլիտայի քաղաքական հետաքրքրությունների շրջանակում.
«Դեռևս նման պրոցեսներ տեղի չեն ունենում, և Հայաստանը առաջվա պես մնում է ռուսական հետաքրքրությունների շրջանակում, բայց ինչպես լինում է նախընտրական տարիներին` ուշադրության թուլացումը կարող է հանգեցնել որոշակի փոփոխությունների նաև հենց Հայաստանի ներքաղաքական կյանքում: Տեղի կունենա՞ դա, թե՞ ոչ` հիմա դժվարանում եմ ասել: Դրա համար պետք է լինել Երևանում և տեսնել, թե ինչքանով է հնարավոր երկխոսությունը ընդդիմության և իշխանության միջև, ինչքանով են լուծվում երկրում առկա սոցիալական խնդիրները, բայց վտանգներ, անկասկած, կան»:
Վլասովն ընդգծեց, որ հետխորհրդային բոլոր երկրներն էլ պետք է հաղթահարեն 2011-2012թթ. ընտրական դժվար գործընթացը, քանզի ինչքան էլ որ նրանք հեռու լինեն միմյանցից, այդուամենայնիվ Ռուսաստանը մեծ ազդեցություն է գործում հետխորհրդային տարածաշրջանում կատարվող իրադարձությունների վրա, և Ռուսաստանի ընտրությունների արդյունքները կարող են որոշիչ դառնալ նաև հետխորհրդային տարածքի համար: