Այս օրերին բերքի մթերման ամենաթեժ սեզոնն է և, ինչպես ամեն տարի, գյուղացիներն այս անգամ կրկին կանգնել են մթերման խնդրի առաջ: Անկախ պատկան մարմինների հավաստիացումներից, թե բերքը դաշտում չի մնա և այլն, իրականությունը բոլորովին այլ է: Հոկտեմբերյանի բնակիչներից մեկը, ով զբաղվում է բանջարեղենի ցանքատարածությունների մշակմամբ, մի քանի օր է՝ իր մշակած բադրիջանի մի քանի տոննա բերքը ձեռքին, չի կարողանում մթերել: Նա դիմել է և՛ «Արտֆուդ» ընկերություն, և՛ «Պռոշյանի» գործարան, և՛ «ՄԱՊ» ընկերություն ու ևս մի քանի այլ ընկերությունների, սակյան բոլորն էլ, նրա խոսքով, հրաժարվել են մթերել իր բերքը՝ պատճառաբանելով, թե իրենք բադրիջանի հետ կապված պայմանագրեր ունեն և պայմանագրով արդեն իսկ մթերումներ անում են:
«Արտֆուդ»-ի գործարանից էլ քաղաքացուն պատասխանել են, որ իրենք օրական ընդամենը 20 տոննա են մթերում, իսկ այդ ծավալները արդեն իսկ ապահովված են: «Հիմա ես չգիտեմ՝ ինչ անեմ: Բերքը ձեռքս ո՞ւր գնամ, ի՞նչ անեմ էդքան բերքը: Տանեմ շուկա, բայց շուկայում մեծածախ բադրջանի գինը 50 դրամ է: Էդ գնով տամ, նշանակում է աշխատանքս գցեմ ջուրը: Իսկ շուկայում ոչ մեկ ինձանից էդքան ապրանք չի վերցնի, որ վաճառի»,- «Առաջին լրատվական»-ի հետ զրույցում դժգոհեց հոկտեմբերյանցի գյուղատնտեսը:
Նրա խոսքով՝ իրավիճակը քիչ այլ է պոմիդորի ու պղպեղի դեպքում: «Էս դեպքում վիճակն ավելի լավ է: Արտահանում եմ դրանք, հատկապես բիբարը, ու ոչ մի խնդիր չի լինում»,- ասաց մեր զրուցակիցը՝ հավելելով, որ միայն պղպեղի մեծածախ գինը արտահանողների համար 400 դրամ է: Արտահանվում է հիմնականում Ռուսաստան: «Շատ ձեռնտու է, հա՛մ գինն է ձեռնտու, հա՛մ էլ մեր տեղացի մթերողների հետ չես առնչվում»,- ասաց նա:
Նույն իրավիճակն է նաև Արարատում, Արտաշատում, որտեղ մշակվող տարածքները էականորեն կրճատվել են: Նրանք նույնպես իրենց բերքը հիմնականում մթերում են «Արտֆուդ»-ում, «ՄԱՊ»-ում, սակայն դեռևս ծիրանի մթերման ժամանակ գյուղացիները բարձրաձայնում էին խնդիրների մասին: Ծիրանը մթերում էին 30-50 դրամով, այն էլ պետք է բերքը բացարձակապես վնասված չլիներ: «Այդ գնով բերք մթերելը նշանակում է, որ ես հազիվ քաղողի փողն եմ հանում: Բա էդքան տանջվեմ ու ապրանքը գցեմ ջո՞ւրը»,- իր հերթին դժգոհեց Արտաշատի բնակիչներից մեկը:
Նրա խոսքով՝ մեկ ամսից արդեն խաղողի բերքահավաքը կսկսվի, ու իրենք նորից կկանգնեն մթերման խնդրի առաջ: «Նախնական պայմանավորվածության համաձայն՝ բերքը քաղում, մեքենաներով տանում, կանգնեցնում ենք գործարանի առաջ, ժամերով արևի տակ սպասեցնում են, բերքը դառնում է զիբիլ, ստիպված իրենց ասած գնով տալիս, ապրանքը գցում ենք ջուրը ու քոռուփոշման գալիս տուն: Բայց որ տելեվիզրով լսես, սաղ օրը, նախարարից սկսած, գովք են անում, թե գյուղացու բերքը գետին չի մնա, գներ են ասում, թվեր են առաջարկում, մարդ մտածումա՝ կարողա՞ ուրիշ երկրի մասին ա խոսքը»,- հավելեց մեր զրուցակիցը:
Ի դեպ, անկախ հավաստիացումներից, այս տարի խաղողի գինը չի կարող նախորդ տարվա չափ լինել: Խաղողի մթերման գինն էականորեն կնվազի, կկրճատվի, քանի որ գինու և կոնյակի արտահանման ծավալները կտրուկ կրճատվել են: Հայրենի արտադրանքը այլևս Ռուսաստանում բարձր գնով չի վաճառվում և ոչ էլ նախկին պահանջարկն ունի: Իրավիճակից ելնելով՝ մթերողները նախ նախորդ տարիների ծավալով մթերում չեն կարող իրականացնել, քանի որ անցած տարվա արտադրանքը դեռ պահեստներում է, և հետո ստիպված կլինեն արտադրանքի գինը նվազեցնել, ինքնարժեքը իջեցնել, որպեսզի կարողանան արտահանել, ու մեր ապրանքը ռուսական շուկայում մրցունակ լինի:
Այնպես որ առաջիկայում հերթական աղմուկը կբարձրանա՝ խաղողի մթերման հետ կապված: Ի դեպ, այս տարի սպասվում է խաղողի աննախադեպ բերք:
