Հունական բանկերը երեքշաբաթյա «արձակուրդից» հետո հուլիսի 20-ին կբացվեն, սակայն կպահպանվեն մի շարք, մասնավորապես՝ կանխիկ գումար հանելու սահմանափակումները։ RIA Novosti-ի փոխանցմամբ՝ այս մասին հաղորդել է Հունաստանի ֆինանսների նախարարությունը:
Ինչպես նախկինում, խոշոր ֆինանսական գործողություններ կարելի է իրականացնել միայն ֆինանսների նախարարության հատուկ հանձնաժողովի թույլտվությամբ:
Ֆինանսների նախարարության մամուլի ծառայությունում հիշեցրել են, որ հուլիսի 20-ին սկսվում է ԱԱՀ-ի նոր տոկոսադրույքների կիրառումը: Հյուրանոցների համար ժամանակավորապես՝ մինչև 2015 թվականի սեպտեմբերի 30-ը, ուժի մեջ կլինի ԱԱՀ-ի 6% տոկոսադրույքը: Հոկտեմբերից հարկը կբարձրանա մինչև 13%:
Նոր օրենսդրական ակտում ասվում է, որ բանկային հաճախորդները կարող են հանել օրական 60 եվրոյից ոչ ավելի: Սակայն եթե միջոցները չեն հանվել մի քանի օր, կարելի է ստանալ կուտակված գումարը, բայց ոչ ավելի, քան շաբաթական 420 եվրո:
Գումար հանելու սահմանափակումները գործում են նաև արտասահմանյան հունական բանկերում:
