«Կենտրոն և Նորք Մարաշ ընդհանուր իրավասության դատարանում հունիսի 20-ին կլինի դատական առաջին նիստը իմ բնակարանի գործով, այս անգամ կքննվի «Լոկալ Դիվելոփըրս» ընկերության հայցն ընդդեմ ինձ և Տերյան 25 շենքի բնակիչներից մեկինը, իսկ ամսի 24-ին նիստ է լինելու մեկ այլ բնակչի՝ վաստակավոր ուսուցչուհու տան գործով, ի դեպ այդ ուսուցչուհուն նախագահը պարգևատրել էր»,- «Առաջին լրատվական»-ի հետ զրուցում ասաց «Մեր քաղաքը» նախաձեռնության ակտիվիստ, Տերյան 23 շենքի բնակիչ Վարդան Գեր Ավետյանը՝ մանրամասնելով, որ դատարաններում առանձին քննվում են 20-ից ավելի բնակիչների նկատմամբ հայցերը, որոնցից երկուսն արդեն դատարանը բավարել է հօգուտ «Լոկալ Դիվելոփըրս» ընկերության սեփականտեր Ս. Մայրապետյանի: Բնակիչը մանրամասնեց, որ առայժմ իր շահերը պաշտպանում է ինքը, 2-րդ նիստից հետո պարզ կլինի՝ կցանկանա օգտվել փաստաբանի ծառայություններից, թե ոչ:
Ըստ Վարդան Գեր Ավետյանի՝ ժամանակն է, որ իշխանությունները Ռ. Քոչարյանի հովանավորյալ Սամվել Մայրապետյանի դեմն առնեն և չթողնեն, որ բնկակիչները զրկվեն իրենց սեփականությունից, այն էլ այն պարագայում, երբ նախագիծ չկա, թե իրենց շենքերի փոխարեն ինչ են կառուցելու, նշանակում է բացառիկ գերակա ոչնչի համար. «Տերյան 25, 23 և Լալայանց 37 շենքերի բնակիչների խնդրով պիտի լուրջ մտահոգվեն, բիզնես շահերի համար ՀՀ քաղաքացիներին վռնդում են իրենց տներից: Թույլ չենք տալու, Հյուսիսային պողոտան կփակենք, և ոչ մի ոստիկան իրեն թույլ չի տա մեզ մոտենալ»,- ասաց Վ. Գեր Ավետյանը՝ հավելելով, որ 17 բնակիչների պաշտպանության համար արդեն իսկ հավաքել են, ծրագրում են ունանալ 20 հազար ստորագրություն:
Մանրամասները ՝ տեսանյութում:
