ԴԱԻՇ ահաբեկչական խմբավորումը Սիրիայի հյուսիս-արևելքում մարտերի ընթացքում թունավոր գազ է կիրառել սիրիացի քրդերի դեմ։ Այս մասին հայտնում է Reuters-ը՝ հղում անելով քրդական Ժողովրդական ինքնապաշտպանական ջոկատների և մոնիտորինգային խմբի ներկայացուցիչներին:
Քրդերի Ժողովրդական ինքնապաշտպանության ներկայացուցչի խոսքով՝ ԴԱԻՇ-ի զինյալները հունիսի 28-ին կիրառել են «ինքնաշեն քիմիական արկեր» քրդերի կողմից վերահսկվող Հասակե քաղաքի տարածքում, ինչպես նաև Թել Բրակե քաղաքից հարավ քրդերի դիրքերի ուղղությամբ հրաձգության ժամանակ:
Ինչպես հայտարարել է քրդերի Ժողովրդական ինքնապաշտպանության մամլո քարտուղարը Ռեդուր Քսելիլը, կիրառված քիմիական նյութի տեսակը դեռ հայտնի չէ: Քիմիական հարձակման հետևանքով քրդերի շրջանում զոհեր չկան՝ նրանք բոլորը ժամանակին տեղափոխվել են հիվանդանոց։ Նա նաև նշել է, որ դա գրոհայինների կողմից քիմիական գազի կիրառման առաջին դեպքն էր:
Սիրիայում մարդու իրավունքների մոնիտորինգով զբաղվող խումբը նույնպես հաստատել է քիմիական գազի կիրառման մասին տեղեկությունը:
