Ադրբեջանական Trend.az կայքի փոխանցմամբ, Ադրբեջանի պաշտպանության նախարար Սաֆար Աբիևն այսօր Բաքվում ընդունել է Թուրքիայի ցամաքային զորքերի հրամանատար, բանակի գեներալ Էրդալ Ջեյլանօղլուին:
Հանդիպման ժամանակ Աբիևը նշել է, որ գնալով ավելի է ամրապնդվում Թուրքիայի ու Ադրբեջանի կապը` հավելելով, որ երկու երկրների միջև եղբայրական հարաբերությունները հիմնված են նրանց ազգային ու պետական շահերի վրա:
Աբիևի հետ համակարծիք է եղել նաև Ջեյլանօղլուն, ով նույնպես կարևորել է երկու երկրների միջև այդ հարաբերությունների ամրագրումը:
Հանդիպման ժամանակ կողմերը քննարկել են երկու երկրների միջև ռազմավարական համագործակցության հեռանկարները: Հանդիպմանը ներկա են եղել նաև Ադրբեջանում Թուրքիայի արտակարգ և լիազոր դեսպան Հուլուսի Քըլըչը և Ադրբեջանում Թուրքիայի ռազմական կցորդ, բրիգադի գեներալ Օզհան Այաշը:
Հիշեցնենք, որ օրեր առաջ Աբիևն այցելել էր Թուրքիա և հանդիպել Թուրքիայի պաշտպանության նախարար Մեհմեթ Վեջդի Գյոնյուլի և Գլխավոր շտաբի պետ Սեբահաթթին Ըշըք Քոշաների հետ:
Ի դեպ, մարտի 10-ին թուրքական խորհրդարանը վավերացրեց 2010 թվականի օգոստոսի 16-ին կնքված և դեկտեմբերի 22-ին Ադրբեջանի խորհրդարանի կողմից վավերացված թուրք-ադրբեջանական ռազմավարական գործընկերության և փոխօգնության մասին պայմանագիրը, իսկ մարտի վերջին Թուրքիայի նախագահ Աբդուլլահ Գյուլն իր ստորագրությամբ հաստատեց այն:
