Ռուսական TASS լրատվական գործակալության փոխանցմամբ՝ թուրքական մարտական ինքնաթիռներն Էգեյան ծովում խախտել են Հունաստանի օդային տարածքը։ Միջադեպի մասին հայտնել է Հունաստանի ազգային պաշտպանության նախարարության գլխավոր շտաբը։
Վերջինիս հաղորդմամբ՝ թուրքական 10 կործանիչներ, որոնցից 2-ը եղել են սպառազինված, 7 անգամ Էգեյան ծովի հյուսիսարևելյան, կենտրոնական ու հարավարևելյան հատվածներում խախտել են հունական ազգային օդային տարածքը։ Հունական կողմն օդ է բարձրացրել իր կործանիչները, որոնք թուրքական կործանիչներին դուրս են մղել Հունաստանի օդային տարածքից։
Հիշեցնենք. 2010 թվականի հոկտեմբերի 20-ին թուրքական «Միլիեթ» թերթը նշել էր, որ Հունաստանը միայն 2009 թվականին Էգեյան ծովի երկնքում մարտական ինքնաթիռների միջոցով Թուրքիայի դեմ իրականացրել է 1383 կանխարգելիչ գործողություն, որոնց վրա ծախսել է 25.620.000 եվրո: Ընդհանուր առմամբ, 2000–2009 թվականներին Հունաստանի ռազմաօդային ուժերն իրականացրել են 19.888 այդպիսի կանխարգելիչ թռիչք, որոնց վրա հունական կողմը ծախսել է 447.5 միլիոն եվրո: Հունաստանն էլ նշում է, որ 2000-2009 թվականներին թուրքական ռազմաօդային ուժերը 49.228 անգամ խախտել են իր օդային սահմանը:
Ինչպես 2014 թվականի դեկտեմբերի վերջին գրեց թուրքական մամուլը՝ պարզվել է, որ 1996 թվականին հենց Հունաստանն է Էգեյան ծովում կործանել Թուրքիայի ռազմաօդային ուժերին պատկանող F-16 ինքնաթիռը և ոչ թե այն կործանվել է հունական մարտական ինքնաթիռի հետ բախման հետևանքով: Օդաչուներից Օսման Չիլեքլիին հաջողվել էր փրկել, իսկ Նաիլ Էրդողանն ինքնաթիռի հետ միասին հայտնվել էր ծովի հատակում:
1996 թվականի հոկտեմբերի 8-ին Թուրքիայի ռազմաօդային ուժերի F-16 կործանիչն Էգեյան ծովում կործանել են Հունաստանի կործանիչները: Ընդգծվել էր, որ Թուրքիայում պաշտոնապես առաջին անգամ է հնչեցվում նման տեսակետ:
