Ֆրանսահայ բժիշկ Սիմոն Էլչյանը 2006 թվականից սկսած կռիվ է տալիս ՀՀ դատական ատյանների հետ, որպեսզի հետ ստանա արդեն իսկ լուծարված «Կրեդիտ Երևան» բանկում ներդրած իր 72 հազար ԱՄՆ դոլար ավանդը, սակայն ապարդյուն:
Էլչյանը 90 հազար ԱՄՆ դոլար գումարը որպես Գրան պրի մրցանակ ժամանակին ստացել է Ֆրանսիայում քաղցկեղի բնագավառում իր կատարած գիտական աշխատանքի համար: Այդ գումարը նա որպես ավանդ 1999 թվականին ներդրել է այն ժամանակ մեծ վստահություն ու համբավ վայելող «Կրեդիտ Երևան» բանկում, որը, ինչպես հայտնի է, 2001 թվականի դեկտեմբերին սնանկ հայտարարվեց:
Հիշեցնենք, որ այդ բանկի սեփականատերը նախկին պատգամավոր Մարտին Հովհաննիսյանն էր, ով բանկի սնանկացումից հետո փախավ Հայաստանից ու այդպես էլ ի հայտ չեկավ ընդհատակից:
Ամեն դեպքում սնանկացած բանկը ժամանակին վերադարձրեց որոշ հայտնի գործարարների գումարները, որոշներին փոխհատուցեց անշարժ գույքով, սակայն սովորական քաղաքացիները, ում մեջքին ոչ ոք չկար կանգնած, այդպես էլ մնացին իրենց գումարներին սպասելով: Նրանց թվում է նաև մեր հիշատակած ֆրանսահայ բժիշկը, ով վճռաբեկ դատարանի՝ իր բողոքը վարույթ չընդունելու որոշումը ձեռքին նախօրեին եկել էր խմբագրություն: Վերջինիս միակ հույսը մնացել են լրատվամիջոցները, քանի որ դատական ատյանները համառորեն չեն բավարարում իր բողոքները:
Էլչյանը մեզ պատմեց, որ բանկի սնանկանալուց հետո ինքը մյուս ավանդատուների հետ միասին 20.000 դոլարը հետ է ստացել, իսկ մնացած գումարը հետ ստանալու համար բազմիցս դիմել է տարբեր ատյանների, անգամ այն ժամանակ ՀՀ նախագահ Ռոբերտ Քոչարյանին, Ֆրանսիայի նախագահ Ժակ Շիրակին, սակայն ոչ ոք նրան որոշակի որևէ պատասխան չի տվել: Իսկ «Կրեդիտ Երևան» բանկի լուծարային կառավարիչ Հովհաննես Թոռչյանը նրան առաջարկել է դիմել դատարան: Էլչյանը այդպես էլ վարվել է, դիմել է դատարան, բողոքարկել է Թոռչյանի գործողութունները, սակայն Կենտրոն և Նորք-Մարաշ վարչական շրջանների դատարանը՝ դատավոր Կարինե Պետրոսյանի նախագահությամբ, մերժել է նրա բողոքը՝ պատճառաբանությամբ, թե այն պետք է քննի տվյալ բանկի սնանկությունը ճանաչած դատարանը, այսինքն՝ ՀՀ Տնտեսական դատարանը: Իսկ Տնտեսական դատարանը ժամանակին հայցը թողել է առանց քննության:
Էլչյանն առաջին ատյանի դատարանի որոշումը բողոքարկել է վերաքննիչ դատարանում, սակայն վերաքննիչ դատարանը վերադարձրել է բողոքը, իսկ Վճռաբեկ դատարանը այս տարվա ապրիլի 29-ին առհասարակ մերժել է վարույթ ընդունել Էլչյանի բողոքը:
Ֆրանսահայ բժիշկը «Առաջին լրատվական»-ի հետ զրույցում գնահատելով ՀՀ դատական մարմինների այդ գործելաոճը՝ նշեց, որ իր նկատմամբ շատ անարդար են վարվում, և պատկան մարմինները պետք է ինչ-որ բան մտածեն, որ այս խնդիրը լուծվի, ու մարդիկ կարողանան հետ ստանալ իրենց հասանելիքը:
«Բանկը մինչ օրս էլ գույք ունի: Ես լսել եմ, որ ժամացույցների գործարանը պետք է վաճառվի, որի գումարներով պետք է փակեն ավանդատուների գումարները, բայց ես չգիտեմ՝ վաճառե՞լ են, թե՞ ոչ, գումարները ո՞ւմ են տվել»,- ասաց Էլչյանը՝ հավելելով, որ շատ ծիծաղելի վիճակ է ստեղծվել. կառավարությունից իրենց ասում են՝ գնացեք բողոքի ակցիաներ արեք, դատավորը դատական նիստից հետո խորհուրդ է տալիս լրատվամիջոցներով խնդիրը բարձրացնել, որ ինչ-որ անձինք լսեն ու լուծումներ փնտրեն:
«Սա զավեշտ է, բայց իմ դեպքը յուրահատուկ է, ես պետք է արտահերթ ստանայի իմ գումարները, քանի որ իմ ավանդը առաջացել էր պարգևատրումից, ինչը դատական ատյաններում հիմնավորվել էր, իսկ օրենքով այդ գումարները պետք է արտահերթ վճարվեին, ու ես չպետք է դիտարկվեի որպես շարքային ավանդատու:
Ես դիմել եմ նախագահին, վարչապետին, առաջին տիկնոջը, բայց ոչ մեկի մոտ հարց չի առաջացել, թե ես ինչ գիտական հայտնագործություն եմ արել, որը Հայաստանին մեծ պատիվ կբերեր»,- եզրափակեց ֆրանսահայ բժիշկը՝ հույս հայտնելով, որ գոնե այս հրապարակումից հետո պատկան մարմինները, հաշվի առնելով բժշկության մեջ իր ունեցած ավանդը, ականջալուր կլինեն իր պահանջին և կվերադարձնեն իր մրցանակի գումարը, որով Էլչյանը պատրաստվում է Հայաստնում քաղցկեղի բուժման կենտրոն հիմնել:
