ԴԱԻՇ-ը թողարկել է նոր՝ Furat Media ռուսալեզու քարոզչական, լրատվական ալիքը: Ենթադրվում է, որ Furat Media նախագիծը կմիավորի իսլամիստների բոլոր ռուսալեզու սոցցանցերը և տեսանյութերը՝ նախկին ԽՍՀՄ տարածքից զինյալներ ներգրավելու համար, հայտնում է գերմանական Deutsche Welle պարբերականը՝ հղում կատարելով բրիտանական The Guardian-ին:
Furat Media «լրատվական գործակալության» բացումը իսլամիստների կողմից հայտարարվել է հուլիսի 5-ին: Հենց այդ ալիքով էլ հայտարարվել է Ռուսաստանում՝ Հյուսիսային Կովկասում ԴԱԻՇ-ի նահանգի ստեղծման մասին:
Հայտնի է դարձել, որ այս նախագծի հիմնադիրներից մեկը ծագումով Վրաստանից, նախկին վրացական զինծառայող, ԴԱԻՇ-ի դաշտային հրամանատար, չեչեն Թարհան Բատիրաշվիլին, նույն ինքը՝ Օմար աշ-Շիշանին է:
Հիշեցնենք, որ անցյալ տարի նոյեմբերին Չեչնիայի ղեկավար Ռամզան Կադիրովը հայտարարել էր Թարհան Բատիրաշվիլիի ոչնչացման մասին, ով իր հայտարարություններով սպառնում էր Ռուսաստանին:
