ԱՄՆ-ի Տրանսպորտային անվտանգության վարչության աշխատակիցը կարողացել է Նյու Ջերսի նահանգի Նյուարկ քաղաքի օդանավակայանում ուսուցողական ռումբ ացկացնել ինքնաթիռ: Այս մասին հայտնում է The New York Post-ը՝ հղում անելով վարչության փակ զեկույցին:
Պարբերականը նշում է, որ փորձը կատարվել է դեռ 2013-ի փետրվարի 25-ին, բայց այն հայտնի է դարձել միայն հիմա: Վարչության աշխատակիցը տաբատի մեջ թաքցնելով՝ ռումբի կաղապարն անցկացրել է մետաղական դետեկտորի միջով: Օդանավակայանի անվտանգության ծառայությունը սարքը չի նկատել նույնիսկ կարճատև զննության ընթացքում և տղամարդուն թույլատրել է ինքնաթիռ բարձրանալ:
Կաղապարն ինքնաշեն պայթուցիկի նմանությամբ է եղել: Թերթը չի կարողացել ճշտել դրա չափերն ու մասերը: Պարբերականի աղբյուրը Տրանսպորտային անվտանգության վարչությունում նշել է, որ նույնիսկ փոքր ռումբը բավարար է ավիավթար առաջացնելու համար:
Աղբյուրի խոսքով՝ փորձը հերթական անգամ ապացուցել է Նյուարկի օդանավակայանի՝ ԱՄՆ-ի տրանսպորտային անվտանգության համակարգի ամենաթույլ օղակի համբավը: Վարչությունը հրաժարվել է մեկնաբանել մամուլում հայտնված տեղեկությունը: Մամլո հաղորդագրությունում նշված է, որ նմանատիպ ստուգումներ կատարվում են պարբերաբար, սակայն դրանց արդյունքները նախատեսված են բացառապես ներքին օգտագործման համար:
Նյուարկի օդանավակայանի անվտանգության ծառայությունն ունի մոտ 1.500 աշխատակից: