Հայաստանում հունիսի 19-ից մեկնարկած բողոքի ակցիաները, այնուհետև Բաղրամյան պողոտայում շուրջ երկու շաբաթ շարունակվող նստացույցը դրական անդրադարձան ոչ միայն այն իմաստով, որ օգոստոսի մեկից շարքային քաղաքացին ստիպված չի լինի էլէներգիայի համար 7 դրամով ավել վճարել, այլ Ռուսաստանն այս ընթացքում մի քանի «նվեր» մատուցեց Հայաստանին:
Հայտնի է, որ «#ElectricYerevan»-ի ողջ ընթացքում ռուսաստանյան ԶԼՄ-ները մեկը մեկի հետևից հրապարակումներ էին անում, թե Հայաստանում Մայդան և գունավոր հեղափոխություն է հասունանում: Իսկ Կրեմլի խոսափող հանդիսացող քաղաքագետները չգիտես որտեղից Երևանի Բաղրամյան պողոտայում Եվրամիության դրոշներ էին տեսել, հետևաբար նաև այս ամենին, ըստ նրանց, արևմուտքն էր սատարում: Ընդ որում ՝ սա նախքան Պարույր Հայրիկյանի՝ Եվրամիության դրոշներով Բաղրամյան պողոտա գալը:
Այսպիսով՝ այս ընթացքում մի քանի կարևոր հանգամանք տեղի ունեցավ՝ նախ ամիսներ շարունակ Ռուսաստանի դատախազություն բազմաբովանդակ նամակներ գրելուց հետո «պատահականությամբ» հենց այդ օրերին Հայաստանի իրավապահ համակարգին հանձնվեց հունիսի 12-ին Գյումրիում տեղի ուենցած ոճրագործության մեղադրյալ Վալերի Պերմյակովի գործը: Ապա Ռուսաստանը 200 մլն դոլարի վարկ տրամադրեց Հայաստանին, որով Հայաստանը Ռուսաստանից նոր զինատեսակներ է գնելու, իսկ մինչ այս պահը գրեթե հաստատ է նաև «Իսկանդեր-Մ» տեսակի հրթիռային համալիրի վաճառքը, ինչը առնվազն երեք տարով գոնե ստատուս քվոյի պահպանման հնարավորություն կտա:
Վերջին օրերին երջանիկ պատահականությամբ կարծես թե լուծվում է նաև Ռուսաստանի միգրացիոն օրենսդրության «Սև ցուցակում» հայտնված ՀՀ քաղաքացիների հարցը: Վերջիններս ամսիներ շարունակ ՀՀ կառավարության, արտաքին գործերի նախարարության շենքերի առաջ բողոքի ցույցեր էին անցկացնում, դիմումներ գրում, նույնիսկ ցանկություն էին հայտնում տուգանք վճարել՝ միայն թե նորից ՌԴ մեկնելու հնարավորություն ստանան։ Հայտնի է, որ երեք տարի ՌԴ մուտք գործելու արգելանք ունեցող քաղաքացիներից շատերը, այնտեղ աշխատելով, ընտանիք էին պահում, ոմանք էլ, ընտանիքին այնտեղ թողնելով, Երևան գալուն պես էին հայտնաբերել, որ երեք տարի այդ երկիր մեկնել չեն կարող: Ավելորդ է խոսել անգամ այն մասին, որ երեք տարով ՌԴ մեկնելու արգելանք ունեցող քաղաքացիների մեջ կային նաև այնպիսիք , որոնք այդ երկիր բուժման նպատակով էին մեկնում:
«Առաջին լրատվական»-ի հետ զրույցում Հայաստանի միգրացիոն ծառայության պետ Գագիկ Եգանյանը թեև համարեց, որ սա իրենց հետևողական աշխատանքի արդյունքն է, այնուհանդերձ նշեց, որ ՌԴ մուտք գործելու արգելանքը վերացնող ՀՀ քաղաքացիների դիմումների գրեթե 63 տոկոսը բավարարվում է: Ընդ որում՝ եթե նախկինում 20-22 տոկոս էր՝ այսինքն՝ 5 դիմումից ընդամենը մեկն էր բավարարվում, և արգելանքը վերացվում, հիմա 5-ից 3-ը բավարարվում է:
Մեզ հետ զրույցում Գագիկ Եգանյանը նշեց նաև, որ ընդհանուր համաներում ՌԴ միգրացիոն օրենսդրությունը խախտած անձանցից միայն ՀՀ քաղաքացիներին չեն կարող տալ, որովհետև բազմաթիվ են նաև այլ երկրների քաղաքացիների կողմից խախտումները:
Սակայն միայն այն փաստը, որ կոնկրետ հայերի մասով այս օրերին կա առաջընթաց՝ այսինքն՝ 2600 քաղաքացու մասով արգելանքը վերացվել է, ողջունելի է, և անշուշտ նման առաջընթացը պարզապես պատահականություն համարել չի կարելի:
