Հռոմի պապ Ֆրանցիսկոսը, ով այցով գտնվում է Բոլիվիայում, հինգշաբթի «խոնարհաբար ներողամտություն» է հայցել հանցանքների համար, որոնք կատարել է Հռոմեա-կաթոլիկ եկեղեցին Ամերիկայի գաղութացման ժամանակ։
Սանտա Կրուսում ելույթի ժամանակ նա հիշեցրել է ավելի վաղ՝ 1992 թվականի հոկտեմբերին, այդ հանցանքները Հովհաննես Պողոս Երկրորդ պապի կողմից ճանաչվելու մասին։ Այս մասին հայտնում է RIA Novosti-ն։
Պապը ելույթի ժամանակ անդրադարձել է նաև աշխարհում ներկայիս տնտեսական մոդելի փոփոխման անհրաժեշտությանը։ «Մենք փոփոխություն ենք ուզում, իսկական փոփոխություն, ողջ հիմնակմախքի փոփոխություն, այս համակարգն արդեն փորձությունների չի դիմանում, այն տանել չեն կարողանում գյուղացիները, աշխատավորները, հանրությունը, ժողովուրդները, ինչպես նաև Մայր Երկիրը»,- ասել է հովվապետը։
Նրա խոսքով՝ երբ կապիտալի կուտակումը մարդկանց համար վերածվում է կուռքի, մարդկային դաժանությունը դուրս է գալիս առաջին պլան և սահմանում ողջ սոցիալ-տնտեսական համակարգի զարգացումը։
