2011թ. ապրիլի 14-ին «Հայաստան» համահայկական հիմնադրամը «Հրայր եւ Մարթա Ալբարյանների անվան կրթաթոշակ» եւ դիպլոմ շնորհեց Երեւանի պետական կոնսերվատորիայի «Լավագույն ուսանող 2010» ճանաչված ջութակահարուհի Աննա Մարգարյանին:
Կրթաթոշակը հովանավորում են Հիմնադրամի արգենտինահայ բարերարներ Հրայր եւ Մարթա Ալբարյանները, ովքեր նաեւ անձամբ են ընտրում տարվա լավագույն ուսանողին` Կոնսերվատորիայի ռեկտորատի կողմից Հիմնադրամին ներկայացված թեկնածուներից: Ընտրված ուսանողին շնորհվում է դիպլոմ եւ 500 ԱՄՆ դոլարին համարժեք դրամ: Ծրագրի նպատակն է սատարել գերազանց սովորող ու շնորհալի ուսանողներին:
«Չնայած սա բավականին համեստ ու փոքրիկ ձեռնարկ է, բայց ունի լուրջ հաջողություններ. բավական է միայն նշեմ այն, որ մեր «Լավագույն ուսանող 2008» Մերի Խոջայանը դարձել է Հանրապետության Նախագահի երիտասարդական մրցանակի արժանավոր: Հավատում եմ, որ Աննան նույնպես կարդարացնի մեր սպասելիքները»,- ասում է Հիմնադրամի գործադիր տնօրենի խորհրդական Աիդա Խաչիկյանը:
Աննա Մարգարյանը կոնսերվատորիայի նվագախմբային ֆակուլտետի լարային բաժնի երկրորդ կուրսի ուսանողուհի է: Երիտասարդ երաժիշտը մասնագիտական հաջողություններ է ունեցել ինչպես հայրենիքում, այնպես էլ արտերկրում. Ալեքսանդր Սպենդարյանի եւ Էմին Խաչատրյանի անվան հանրապետական մրցույթների դափնեկիր է, Փարիզում կայացած «Ֆլեմ» պատանի երաժիշտների միջազգային մրցույթի երկրորդ մրցանակակիր:
Թե ինչպես է տնօրինելու իր վաստակած գումարը Աննան դեռ չի որոշել, սակայն մի նպատակ նա իր առջեւ հստակ դրել է. «Երազում եմ բացօթյա համերգ տալ Վիկտորիա ջրվեժի բնապատկերին»,- ասում է նա:
