Haqqin.az պորտալի փոխանցմամբ՝ ամերիկացի 16 սենատորներ նախօրեին նամակ են գրել Ադրբեջանի նախագահ Իլհամ Ալիևին: Իրենց նամակում սենատորները մտահոգություն են հայտնել Ադրբեջանում խոսքի ազատության ու քաղաքացիական հասարակության շուրջ տիրող իրավիճակի կապակցությամբ:
Նամակում սենատորներն իրենց դժգոհությունն են հայտնել «Ազատություն» ռադիոկայանի ու ԵԱՀԿ-ի գրասենյակների փակման, ինչպես նաև իրավապաշտպանների կալանավորման կապակցությամբ: Սենատորները «Ազատություն» ռադիոկայանի գրասենյակի փակումը որակել են որպես Ադրբեջանում խոսքի ազատության հալածանք:
Նամակում ամերիկացի սենատորներն Ադրբեջանի իշխանություններին կոչ են արել ազատ արձակել կալանավորված իրավապաշտպաններին, ապահովել ընդդիմադիր ԶԼՄ-ների ազատ գործունեությունը, դադարեցնել քաղաքացիական հասարակության վրա ճնշումները և դրանով իսկ վերացնել խոչընդոտները ԱՄՆ-ի ու Ադրբեջանի երկկողմ հարաբերությունների ամրապնդման հարցում:
