Sputnik Georgia լրատվական գործակալության փոխանցմամբ՝ Ռուսաստանի հետ հարաբերությունների կարգավորման հարցերով Վրաստանի վարչապետի հատուկ ներկայացուցիչ Զուրաբ Աբաշիձեն հույս է հայտնել, որ մինչև տարեվերջ կլուծվի Վրաստանի քաղաքացիների՝ հայրենիք վերադառնալու հարցը, որոնք Ռուսաստանում դատապարտվել են լրտեսության մեղադրանքով:
Աբաշիձեի խոսքով՝ տվյալ հարցը քննարկվելու է հուլիսի 15-ին՝ Պրահայում, որտեղ նա կհանդիպի Ռուսաստանի փոխարտգործնախարար Գրիգորի Կարասինի հետ. «Կան մարդասիրական հարցեր, և մասնավորապես մեր քաղաքացիներն այնտեղ ազատազրկում են կրում լրտեսության համար: Մենք արդեն իսկ վերադարձրել ենք մեր քաղաքացիներից երեքին: Հուսով եմ, որ մինչև տարեվերջ մենք ամբողջովին կլուծենք այդ խնդիրը»:
Աբաշիձեն հավելել է, որ Կարասինի հետ քննարկելու է Ռուսաստանի ու Վրաստանի միջև առևտրային հարաբերությունները և ավտոմոբիլային հաղորդակցությունը: Աբաշիձեն ընդգծել է, որ այժմ վրացական մի շարք ապրանքատեսակներ կարող են դուրս գալ ռուսական շուկա, և որ իրենք փորձում են լուծել մյուսների հարցը:
