Թուրքական Son dakika լրատվական կայքի փոխանցմամբ՝ Պոլսո Հայոց պատրիարքի փոխանորդ Արամ արքեպիսկոպոս Աթեշյանը երեկ այցելել է Շանլըուրֆա նահանգ, որի Սուրուչի շրջանում սիրիացի փախստականների համար կառուցված է վրանային ճամբար, որում գտնվում է 35.000 մարդ: Ընդգծվում է, որ դա Թուրքիայի ամենամեծ վրանային ճամբարն է:
Աթեշյանը հանդիպել է Սուրուչի շրջանի ղեկավար Աբդուլլահ Չիֆթչիի հետ, որը նրան իրազեկել է փախստականների ճամբարում տիրող վիճակի մասին: Իր ելույթում Աթեշյանը հայտարարել է. «Թուրքիան զոհողությունների է դիմում բոլորի համար: Նա տանիք է տվել բոլորին՝ չկիրառելով կրոնական, ռասայական, դավանաբանական խտրականություն»:
Աթեշյանը վրանային ճամբարում հանդիպել է Սիրիայի Քոբանի քաղաքից Սուրուչ ժամանած և ապաստանած հայ ընտանիքի՝ Թովմասյանների հետ: Աթեշյանի խոսքով՝ Սիրիայից այդ վրանային ճամբար է եկել 3 հայ ընտանիք՝ բաղկացած 18 անդամից, և որ իրենք ցանկացել են տեսնել ու լսել նրանց, ծանոթանալ նրանց վիճակին:
Աթեշյանը բնական է համարել, որ Սուրուչի ճամբար է ժամանել առաջին հերթին հայերի համար՝ հավելելով, որ իրենք մտածում են, թե ինչ կարելի է անել երեխաների համար: Աթեշյանը գոհունակություն է հայտնել փախստականներին Թուրքիայի ցուցաբերած մոտեցումից. «Եվս մեկ անգամ հասկացա Թուրքիայի Հանրապետություն պետության մեծությունը»:
Հիշեցնենք, որ հուլիսի սկզբին հաղորդվեց, որ ԴԱԻՇ-ի զինյալները Քոբանիում հայ են սպանել: Քոբանիում սպանված հայի եղբայր Հակոբ Թովմասյանը «Ռադիկալ» թերթին հայտնել էր, որ ԴԱԻՇ-ի հարձակումից հետո Քոբանիի 8 հայ ընտանիքներից մեկն ապաստանել է Ուրֆայում, մյուսը՝ Հաթայում, մեկ ուրիշը՝ Հալեպում, իսկ անձնագիր ունեցող երկու ընտանիք տեղափոխվել են Հայաստան: Մնացյալ երեք հայ ընտանիքներն ապաստանել են թուրք-սիրիական սահմանի մոտ գտնվող Թուրքիայի Սուրուչի շրջանի գաղթականների վրանային ճամբարում:
