ՆԱՏՕ-ն կպահպանի Ռուսաստանի հետ քաղաքական կապերի համար հնարավորությունը, որոնք հատկապես կարևոր են ռազմական լարվածության ժամանակ՝ հայտարարել է ՆԱՏՕ-ի գլխավոր քարտուղար Յենս Սթոլթենբերգը «Ուկրինֆորմի» հետ զրույցում։
Նա հիշեցրել է, որ անցած գարնանը Ուկրաինայի իրադարձությունների պատճառով դաշինքը որոշել էր դադարեցնել գործնական համագործակցությունը Ռուսաստանի հետ։
«Սակայն միևնույն ժամանակ մենք որոշել ենք բաց պահել քաղաքական կապերի համար հնարավորությունը։ Ես համոզված եմ, որ դա կարևոր է՝ հատկապես այնպիսի ժամանակներում, երբ լարվածությունն ուժեղանում է, երբ մենք սահմանների երկայնքով ռազմական ներկայության աճ ենք տեսնում։ Այդ իսկ պատճառով ՆԱՏՕ-ն կշարունակի պահպանել այդ հնարավորությունը, որպեսզի մեր ազդանշանները փոխանցի Ռուսաստանին միջազգային կանոնների, միջազգային իրավունքների և, որ ոչ պակաս կարևոր է, հարևանների սահմանների հանդեպ հարգանքի կարևորության մասին»։
Նա նշել է, որ դաշինքը որևէ հակասություն չի տեսնում ուժեղ պաշտպանության և երկխոսության միջև։ «Ուժեղ պաշտպանությունն ապահովում է հնարավորություն՝ գնահատելու Ռուսաստանի հետ քաղաքական երկխոսության համապատասխանությունը»,- ասել է Սթոլթենբերգը։