Գերմանիայի կառավարությունը դիտարկում է Լիբիայի առաջնորդ Մուամար Քադաֆիի` գերմանական բանկերում սառեցված հաշիվները ՄԱԿ-ին փոխանցելու հնարավորությունը: Տարբեր գնահատականներով` այդ երկրի բանկերում կուտակվել է մոտ 6 մլրդ եվրո, որոնք պատկանում են Քադաֆիին և նրա ընտանիքի անդամներին:
«Միացյալ ազգերի կազմակերպությունը կարող է օգտագործել այդ գումարները հումանիտար օգնություն տրամադրելիս, որպեսզի թեթևացնի Լիբիայի ժողովրդի տառապանքները»,- Der Speigel-ին ասել է Գերմանիայի էկոնոմիկայի նախարար Ռայներ Բրյուդերլեն: Նա հավելել է, որ այդ գումարները չպետք է բաժին հասնեն այլ երկրների, այլ անհրաժեշտ է օգտագործել դրանք Լիբիայի ժողովրդին օգնելու համար, այդ պատճառով նա կոչ է արել Եվրամիությանը գումարները փոխանցել ՄԱԿ-ին:
Տեղեկացնենք, նաև, որ Լիբիայի ֆինանսների նախարարը հայտարարել է, որ անցած մեկուկես ամսա ընթացքում օտարերկրյա բանկերում սառեցվել են Լիբիային պատկանող մոտ 120 մլրդ դոլարի հաշիվներ, սակայն Լիբիան ունի անհրաժեշտ միջոցներ «ագրեսիային դիմակայելու և կայունություն ապահովելու համար»: Այս մասին հաղորդում է Reuters գործակալությունը:
Ապրիլի 17-ին Մեծ Բրիտանիայի վարչապետ Դեյվիդ Քեմերոնը հայտարարել է, որ ցամաքային գործողություններ իրականացնելու ՄԱԿ-ի սահամանափակումները դժվարացնում են ռազմական գործողությունը Լիբիայում: Այս մասին հաղորդում է SkyNews-ը: Նրա խոսքերով, այդ բանաձևը թույլ չի տալիս «վերջնականապես որոշել ռազմական գործողությունների ելքը»:
Հայտնի է, որ որոշ երկրներ, այդ թվում` Մեծ Բրիտանիան և Ֆրանսիան, հայտարարել են, որ անհրաժեշտ է իրականացնել ցամաքային գործողություններ, թեպետ միջազգային հանրությունը կոչ է անում սահմանափակվել միայն օդային ռմբակոծություններով:
