Ադրբեջանական Anspress.com կայքի փոխանցմամբ` Թուրքիայի, Իրանի ու Ադրբեջանի արտգործնախարարներ Ահմեթ Դավութօղլուն, Ալի Աքբար Սալեհին և Էլմար Մամեդյարովը երեկ իրանական Ուրմիա քաղաքում կայացած հանդիպման ժամանակ համատեղ փաստաթուղթ են ստորագրել: Այն բաղկացած է 9 կետից:
Առաջին կետում խոսք է գնում եռակողմ համատեղ ներդրումների մասին, որոնք կոչված են տնտեսական համագործակցության մեծացմանը, ինչպես նաև էներգետիկայի, զբոսաշրջության և այլ ոլորտներում կոմերցիոն և արդյունաբերական նախագծեր իրականացնելուն առնչվող պլանների մասին: Դա վերաբերում է նաև երեք երկրների սահմանամերձ գոտիներին:
Կողմերը պայմանավորվել են ստեղծել տնտեսական խնդիրների գծով եռակողմ մեխանիզմ, նվազեցնել մաքսատուրքերը, հեշտացնել սահմանների հատման գործընթացը, արդիականացնել և վերանորոգել սահմանային կետերը, ինչպես նաև ստեղծել համատեղ ընկերություններ:
Փաստաթղթում տեղ գտած կետերից մեկն առնչվում է արտասահման մեկնող քաղաքացիների խնդիրների հարթման համար նախատեսված հյուպատոսային ծառայության կոմիտեի ստեղծմանը:
Բացի այդ, պայմաններ են ստեղծվելու երեք երկրների միջև պատմական անձանց տարեդարձերի համատեղ տոնման և մշակութային միջոցառումների անցկացման համար:
Երեք երկրները պայմանավորվել են միմյանց միջև տեղեկատվության փոխանակման մասին, ինչը վերաբերում է ահաբեկչության, զենքի մաքսանենգության, թմրանյութերի առաքման և ապօրինի ներգաղթյալների դեմ պայքարի ու դրանց վերահսկման ոլորտներին:
Կետերից մեկն իր մեջ ներառում է երեք երկրների միջև հարաբերությունների զարգացումն այն միջազգային կազմակերպություններում, որոնց անդամ են հանդիսանում նրանք:
Երեք երկրներն էլ դատապարտում են զանգվածային բողոքի ցույցերի ժամանակ ժողովրդի դեմ կոշտ միջոցների կիրառումը և գիտակցում են մարդու սոցիալական ու մշակութային իրավունքների վերականգնման կարևորությունը:
Կողմերը պայմանավորվել են իրենց հաջորդ հանդիպումն անցկացնել այս տարվա հոկտեմբերին, Նախիջևանում:
Հիշեցնենք, որ Նախիջևանն առանձնահատուկ նշանակություն ունի պանթյուրքիզմի տեսանկյունից: Այդ տարածքը, ըստ էության, կապող օղակ է Թուրքիայի ու Ադրբեջանի, Թուրքիայի և ողջ Թուրանի միջև: Ժամանակին Հեյդար Ալիևը Նախիջևանը որակել է որպես դեպի թուրք-իսլամական աշխարհ բացվող դուռ: