Ադրբեջանական 1news.az կայքի փոխանցմամբ, ապրիլի 5-ին Բաքվում տեղի ունեցած անսովոր անձրևից հետո` ապրիլի 13-ին, քաղաքի ամպամած երկինքն անսպասելի ներկվել է դեղին գույնով: Բաքվի բնակիչները կարծել են, թե դա ճապոնական «Ֆուկուսիմա 1» ատոմակայանում տեղի ունեցած վթարի հետևանք է:
Այժմ Ադրբեջանում ճշգրտվում են այս երևույթի պատճառները: Միևնույն ժամանակ, Ռադիացիոն խնդիրների ինստիտուտի տնօրեն Ադիլ Ղարիբովը հերքել է, որ այդ «դեղնային լուսավորման» երևույթը կարող է կապված լինել ռադիացիոն արտահոսքի հետ.
«Բաքվում այդպիսի երևույթներ գրանցվել են նաև նախկինում: Ամենայն հավանականությամբ, դա կապված է փոշոտ տեղումների հետ, ինչպես որ տեղի ունեցավ ապրիլի 5-ին: Այդ օրն արաբական թերակղզում գրանցված ավազային փոթորկի արդյունքում Բաքվում տեղաց «կեղտոտ անձրև»»:
Բազմաթիվ ականատեսներ հաստատում են Ղարիբովի խոսքերը` նշելով, որ թե՛ ապրիլի 5-ին, թե՛ ապրիլի 13-ին տեղի ունեցած անձրևներն իրենց հագուստի վրա փոշու հետքեր են թողել:
Ադրբեջանի բնապահպանության ու բնապաշարների նախարար Բագիրովի տվյալներով, չորեքշաբթի օրը Բաքվում գրանցված փոշու մակարդակը 1.5-2 անգամ գերազանցել է սովորական նորման, ինչը նույնպես կարող էր հանգեցնել ամպերում փոշու կուտակմանը.
«Նմանատիպ բնական աղետները կապված են արևային փոթորիկների հետ: Այս բնական երևույթը որևէ հետևանք չի կարող ունենալ մարդկանց առողջության վրա»:
