ԱԺ ՀՀԿ խմբակցության անդամ Խոսրով Հարությունյանը համաձայն չէ տեսակետներին, թե ընդդիմություն-իշխանություն խորհրդարանական բանակցությունները տապալվել են, դա այդպես է առերևույթ, բայց սպառված չեն հնարավորությունները, որ խորհրդարանը կդառնա քաղաքական բանավեճի ամբիոն: «Ի՞նչ ունենք ընտրությունների արդյունքում, եթե մի պահ վերանանք քաղաքական երթերից և փորձենք փաստերի վրա խոսել. կարող ենք ասել, որ ժողովրդավարական զարգացումների, ժողովրդական մտածելակերպի առումով ունենք հետաքրքիր արձանագրումներ. որքան էլ փորձում է ընդդիմությունը բողոքարկել քվեարկության արդյունքները, փաստերով և միջազգային կառույցների գնահատմամբ՝ դրանք մեկ քայլ առաջ են, այսինքն հանրության իրական հայելապատկերն էին: Կարևոր է, որ չունենք երկփեղկված հանրություն, այդ թշնամությունն ու խորթությունը, ինչպես նախորդ ընտրություններում էին, չկա երբ իրար թշնամացան ընկերները: Ունենք քաղաքական փխրուն ձեռքբերումներ, որի պահպանման համար բոլոր դերակատար ուժերը պատասխանատու են»,- «Արմնյուզ» հեռուստաընկերության «Բանաձև» հաղորդման եթերում ասել է Խոսրով Հարությունյանը և հավելել, որ ցույցերն ու երթերը քաղաքական որևէ ուժի դիրքորոշումը հանրությանը ներկայացնելու ձև են, բայց չի կարծում, որ դրանով կվտանգեն ձեռքբերումները:
«Ես այն կարծիքին եմ, որ իշխաւթյունը չի փորձում սադրել, դրդել ընդդիմությանը այնպիսի քայլերի, որ կսրեն իրադրությունը: Իշխանությունը պատասխանատու վարքագիծ է դրսևորում»,- ասել է Խոսրով Հարությունյանը։ Իսկ ինչ վերաբերում է Րաֆֆի Հովհաննիսյանի բառապաշարի կոշտացմանը՝ ելույթից ելույթ, համարում է, որ դա կրքերը բորբոքվելու հետևանք է. «Կրքերը բորբոքվում են, մի երկու բան էլ ավել է ասում»:
ՀՀԿ խմբակցության անդամը բավարարված է այս ընտրությունների արդյունքներով, ոչ թե այն պատճառով, որ անկախութան տարիներին և վերջին տարիներին դերակատար գործիչը հաջողություն ունեցավ, այլ որ ընդդիմությունը լուրջ քաղաքական հենարան է ունենում՝ ի դեմս 540 հազար ընտրողի: Այլ հարց է, թե ինչպես արդյունավետ կօգտագործի ընդդիմությունը այդ ռեսուրսը:
Րաֆֆի Հովհաննիսյանը, ըստ Խոսրով Հարությունյանի, պետք է փորձի ընդդիմություն-իշխանություն հարաբերությունների նոր մակարդակ ապահովել, այլ ոչ թե ցանկացած գնով հասնել իշխանության: Ընդդիմությունը պետք է կարողանա ազդել քաղաքական գործընթացների վրա և մղել փոփոխությունների: «Բոլոր նրանք, ովքեր ձայն են տվել Րաֆֆի Հովհաննիսյանին, կողմ են փոփոխությունների, խնդիրների լուծումը չեն տեսնում Սերժ Սարգսյանի մեջ: Սերժ Սարգսյանին ձայն տվածներն էլ են սպասում արմատական փոփոխությունների: Մոտ 1,5 միլիոն մարդ սպասում է արմատական փոփոխությունների»,- ասել է Խոսրով Հարությունյանը: Նա նշել է, թե բոլորը մեղադրում են Սերժ Սարգսյանին, որ չի կատարել խոստումների մի մասը՝ հաշվի չնստելով այն հանգամանքի հետ, որ եղավ Մարտի 1 և ֆինանսատնտեսական ճգնաժամ: Խոսրով Հարությունյանը նշել է, որ Սերժ Սարգսյանը աշխարհի համար ընդունելի քաղաքական գործիչ է, այնինչ հայտնի չէ, թե որն է Րաֆֆի Հովհաննիսյանի թիմը: Րաֆի Հովհաննիսյանը հանգամանքների բերումով հասել է ալիքի կատարին և այժմ գտնվում է իր քաղաքական կենսագրության ամենապատասխանատու փուլում:
Եթե «Ժառանգության» առաջնորդը խորհուրդ հարցներ Խոսրով Հարությունյանից, ինքը խորհուրդ կտար նստել բանակցությունների սեղանի շուրջ և մշակել քաղաքական օրակարգը և խնդիրների լուծման «ճանապարհային քարտեզը»: Այդ հնարավորությունը կարող էր նա չունենալ ընտրություններից հետո:
