Ադրբեջանական APA լրատվական գործակալության փոխանցմամբ, Ադրբեջանում գտնվող նախկին խորհրդային բանակից մնացած ռազմաբազաներից մեկում հայտնաբերվել է այնպիսի զինամթերք, որին մինչ այդ չէին հանդիպել Ադրբեջանում: Խոսքը Բաքվի շրջանի Գյուզդեկ ավանում գտնվող ռազմաբազայի մասին է:
Այդ զինամթերքը հայտնաբերել է Գյուզդեկի ռազմաբազայի տարածքի մաքրմամբ զբաղվող Ֆիզուլի Նամազովը, ով դեպքի կապակցությամբ նշել է.
«Մենք այս պահեստում հայտնաբերել ենք այնպիսի զինամթերք, որին ցայժմ չէինք հանդիպել Ադրբեջանի տարածքում: Դա բարդացնում է մեր աշխատանքը և մեծացնում վտանգը: Այդ զինամթերքը տարբերվում է իր յուրահատկությամբ և հիմնականում նախատեսված է դիվերսիոն գործողությունների համար: Ամենից շատ դրանում հանդիպում է С4 տիպի պայթուցիկ:
Արդեն իսկ մաքրման աշխատանքներ են իրականացվել խորհրդային ժամանակներում պայթեցված 22 զինապահեստներից 18-ում: Մնացած 4-ում շարունակվում են աշխատանքները: Հեռակառավարվող ռոբոտների օգնությամբ զինամթերքը դուրս է բերվում զինապահեստներից և փոխադրվում հրաձգարաններ, ուր և պայթեցվում է: Վնասազերծվել է 10.852 ական»:
Նշվում է, որ Ադրբեջանի տարածքը լքելիս խորհրդային բանակը պայթեցրել է Գյուզդեկի ռազմաբազան, որը հիմնականում նախատեսված է եղել հատուկ գործողությունների համար: Խորհրդային ժամանակներում այնտեղ նախապատրաստություն են անցել ԽՍՀՄ հանդեպ բարյացակամ տրամադրված Մերձավոր Արևելքի երկրների հատուկ նշանակության զորքերի ներկայացուցիչները:
Հիշեցնենք, որ ԽՍՀՄ փլուզումից հետո Ադրբեջանը ստացել է 436 տանկ, 558 հետևակի զրահամեքենա, 388 հրանոթային համակարգ, 63 ինքնաթիռ, 8 ուղղաթիռ:
