Թուրքական Sabaհ թերթի փոխանցմամբ՝ Թուրքիայի խորհրդարանում երեկ տեղի է ունեցել նորընտիր պատգամավորների երդմնակալության արարողությունը: Դրա շրջանակներում խորհրդարանի նախագահ Ջեմիլ Չիչեքն իր լիազորությունները ժամանակավորապես հանձնել է ամենատարեց պատգամավոր, 77-ամյա Դենիզ Բայքալին:
Խորհրդարանի նախագահի ընտրություններն անցկացվելու են հունիսի 30-ին, իսկ խորհրդարան անցած կուսակցությունների կողմից այդ պաշտոնում իրենց թեկնածուներին առաջադրելու ժամկետը սպառվում է հունիսի 27-ին: Երդմնակալության արարողությունից հետո հայտնի է դարձել, թե ովքեր են հավակնում Թուրքիայի խորհրդարանի նախագահի պաշտոնին:
Ներկա դրությամբ միայն «Արդարություն և զարգացում» կուսակցությունը (ԱԶԿ) չի կողմնորոշվել, թե ում թեկնածությունն է առաջադրելու այդ պաշտոնում: Ժողովրդահանրապետական կուսակցության (ԺՀԿ) թեկնածուն խորհրդարանի ներկայիս ժամանակավոր նախագահ Դենիզ Բայքալն է:
«Ազգայնական շարժում» կուսակցության (ԱՇԿ) թեկնածուն Էքմելեդին Իհսանօղլուն է, ով 2014 թվականին Թուրքիայում անցկացված նախագահական ընտրություններում ներկայիս նախագահ Ռեջեփ Էրդողանի հիմնական մրցակիցն էր: Ինչ վերաբերում է քրդամետ Ժողովրդադեմոկրատական կուսակցությանը (ԺԴԿ), ապա նրա թեկնածուն Միր Դենգիր Ֆըրաթն է: Առաջին երկու փուլում Թուրքիայի խորհրդարանի նախագահի թեկնածուն պետք է ստանա 367 քվե (2/3), իսկ երրորդ փուլում՝ պարզ մեծամասնություն (276 քվե):
