Թուրքական Internet Haber լրատվական կայքի փոխանցմամբ՝ այսօր Թուրքիայի խորհրդարանի շենքում տեղի է ունեցել նորընտիր պատգամավորների երդմնակալության արարողությունը: 24-ամյա ընդմիջումից հետո երդվելու նպատակով Թուրքիայի խորհրդարանի ամբիոնի մոտ հայտնվել է քուրդ պատգամավոր Լեյլա Զանան, ով երկու դեպքում էլ աչքի է ընկել արտասովոր պահվածքով:
Լեյլա Զանան, ով ներկայացնում է քրդամետ «Ժողովուրդների դեմոկրատական» կուսակցությունը (ԺԴԿ), պատգամավոր է ընտրվել Աղրը (Արարատ) նահանգից: Թուրքիայի խորհրդարանում Լեյլա Զանայի առաջին երդումը տեղի է ունեցել 1991 թվականի նոյեմբերի 6-ին՝ Թուրքիայի 19-րդ գումարման խորհրդարանի անդրանիկ նիստում:
Այն ժամանակ Լեյլա Զանան երդման տեքստը սկսել է կարդալ թուրքերեն (ինչպես որ նախատեսված է օրենքով), սակայն այն եզրափակել էր քրդերենով՝ իր երդումը նվիրելով քուրդ և թուրք ժողովուրդների միասնությանը: Նա ամբիոնի մոտ հայտնվել էր քրդական դրոշի գույները (դեղին, կարմիր, կանաչ) խորհդանշող մազակալով: Զանայի այս գործողություններն այն ժամանակ մեծ աղմուկ էին բարձրացրել խորհրդարանում, նրանից պահանջել էին ցած իջեցնել այդ «դրոշը», ապա նրան վռնդել էին խորհրդարանի ամբիոնից: Լեյլա Զանայի այդ պահվածքը Թուրքիայի քաղաքական պատմության մեջ մտել է որպես «քրդերենով երդվելու ճգնաժամ»: 1994 թվականին Լեյլա Զանան իր համախոհների հետ ձերբակալվեց և «արգելված կազմակերպության անդամ» (PKK) հանդիսանալու համար դատապարտվեց 15 տարվա ազատազրկման:
Լեյլա Զանան այս անգամ աչքի չի ընկել նման պահվածքով: Թուրքիայի 25-րդ գումարման խորհրդարանի առաջին նիստում Լեյլան երդման տեքստը կարդացել է թուրքերեն, դրանում չի հավելել քրդերեն բառեր, սակայն փոխարենը Լեյլա Զանան այս անգամ երդման տեքստում առկա «թուրք ազգ» արտահայտությունը փոխարինել է «Թուրքիայի ազգ» արտահայտությամբ: Լրատվամիջոցն ընդգծում է, որ խորհրդարանի նախագահ Ջեմիլ Չիչեքը նրան կրկնել չի տվել երդման տեքստը:
