Թուրքական Hürriyet Daily News թերթի փոխանցմամբ՝ Անկախ արդյունաբերողների և գործարարների կազմակերպության (MÜSİAD) ղեկավար Նաիլ Օլփաքը հայտարարել է, որ իրենք դեմ են Թուրքիայում արտահերթ խորհրդարանական ընտրությունների անցկացմանը: Օլփաքը դա հիմնավորել է նրանով, որ նոր ընտրությունների արդյունքները շատ չեն տարբերվի հունիսի 7-ի ընտրությունների արդյունքներից և չեն հանգեցնի էական փոփոխությունների:
Անդրադառնալով կոալիցիոն կառավարության ձևավորման խնդրին՝ Օլփաքը հիշեցրել է, որ իրենք վերջերս հանդիպումներ են ունեցել խորհրդարան անցած քաղաքական կուսակցությունների առաջնորդների և երկրի նախագահ Ռեջեփ Էրդողանի հետ:
Օլփաքը հայտարարել է, որ նպատակահարմար է համարում «Արդարություն և զարգացում» կուսակցության (ԱԶԿ) և Ժողովրդահանրապետական կուսակցության (ԺՀԿ) միջև կոալիցիոն կառավարության ձևավորումը, քանի որ կոալիցիոն այդ կառավարությունն ավելի երկար կյանք կունենա, քան մնացյալ բոլոր տարբերակների դեպքում:
Դրա հետ մեկտեղ նա նկատել է, որ ԱԶԿ-ի և «Ազգայնական շարժում» կուսակցության (ԱՇԿ) միջև կոալիցիայի ձևավորումը ավելի հեշտ կստացվի, քան ԱԶԿ-ի ու ԺՀԿ-ի պարագայում, սակայն կոալիցիոն (ԱԶԿ-ԱՇԿ) այդ կառավարությունը չի լինի այդքան լայնամասշտաբ և չի ունենա երկար կյանք:
