Այսօր երրորդ օրն է՝ Գյումրիում շարունակվում էին էլեկտրաէներգիայի թանկացման դեմ բողոքի ցույցերն ու հանրային քննարկումները: Արդեն հանդիպման կայուն վայր դարձած Գյումրու Թատերական հրապարակում երեկոյան 6-ին հավաքվեցին նախաձեռնող խմբի անդամներն ու մտահոգ գյումրեցիները: Այս անգամ միասնական ու ինքնաբուխ կերպով որոշվեց, որ չպետք է վճարեն ՀԷՑ-ին նոր սակագնով այնքան ժամանակ, քանի դեռ միջազգային անկախ աուդիտորական որևէ ընկերություն չի իրականացնի համապատասխան ուսումնասիրություններ ու իր կարծիքը չի հայտարարի թանկացման հիմնավորվածության առնչությամբ: Ապա որոշվեց, որ պետք է այս օրերին, սկսած այդ պահից, իրականացնել իրազեկման միջոցառումներ քաղաքի տարբեր հատվածներում, փողոցներում ու թաղամասերում, որպեսզի բոլորը մանրամասնորեն տեղյակ լինեն կատարվող ապօրինությունների մասին:
Այս որոշումներից հետո ցույցի մասնակիցներն ու կազմակերպիչները մեքենաներով և քայլերթով սկսեցին մտնել քաղաքի տարբեր թաղամասեր և տեղեկացնել այս որոշման մասին:
Նշենք, որ այս միջոցառումները լայն արձագանք են գտնում գյումրեցիների կողմից, ինչպես շարքային քաղաքացիների, այնպես էլ մտավորականության: Բազմաթիվ գյումրեցիներ արդեն միացել են ակցիային:
Մի նկատառում ևս. այսօր բողոքի ակցիան անցավ բավականին հանգիստ ու առանց միջադեպերի՝ ի տարբերություն երեկվա, երբ Գյումրիի «բարեփոխված» փոխոստիկանապետ Վ. Ենգոյանը անհարկի կերպով ու կոպիտ կեցվածքով և հայհոյախառն բառապաշարով միջադեպ ստեղծեց ակտիվիստներից Կարեն Պետրոսյանի հետ, որը հարթվեց մյուս փոխոստիկանապետ Ա. Գրիգորյանի կողմից:
Միջադեպի նկատմամբ բուռն էր գյումրեցի լրագրողների արձագանքը, և այսօրվա նորմալ ընթացքը, ըստ ամենայնի, նաև լրագրողական հետագա արձագանքից ու հարցի հանրայնացման հետագա ընթացքից խուսափելու համար էր:
Լուսանկարը՝ ԳԱԼԱ-ի
