Հունիսի 17-ին «Բաց երկնքի՞», թե՞ դատարկ երկնքի քաղաքականություն» վերտառությամբ հոդված էինք հրապարակել, որտեղ անդրադարձել էինք ԱԺ-ում «Ավիացիայի մասին» օրենքում փոփոխություններ և լրացումներ կատարելու մասին կառավարության նախագծի քննարկումներին:
Մասնավորապես այդ քննարկման ժամանակ ԱԺ տնտեսական հարցերի հանձնաժողովի նախագահ Վարդան Այվազյանը անդրադարձավ օդանավակայանում ուղևորներից մատնահետք վերցնելու ծառայությունից հրաժարվելուն, քանի որ այն արհեստականորեն թանկացնում է տոմսի գինը: Մենք հայտնել էինք, որ տեղեկություններ ունենք, որ սույն ծառայության համար գանձվող 2 դոլարը հասնում է նախկին փոխվարչապետ Արմեն Գևորգյանին: Եվ ահա ստացել ենք Գևորգյանի կողմից ղեկավարվող «Հայաստանի զարգացման հեռանկարներ» կազմակերպության հանրային կապերի բաժնի հերքումը: Իհարկե, ավելի ճիշտ կլիներ, որ իր հետ կապված տեղեկությունը հերքեր անձամբ Արմեն Գևորգյանը և ոչ թե մի կազմակերպություն, որի ղեկավարը Արմեն Գևորգյանն է:
Ի վերջո, հրապարակումը չի վերաբերել «Հայաստանի զարգացման հեռանկարներ» կազմակերպության աշխատանքին կամ Արմեն Գևորգյանի՝ որպես այդ կազմակերպության ղեկավար ծավալած գործունեությանը: Բայց Հայաստանում անձն ու կազմակերպությունը նույնականացված են, և Արմեն Գևորգյանն ու «Հայաստանի զարգացման հեռանկարներ» կազմակերպությունը այս իմաստով, ցավոք, բացառություն չեն: Ցավոք, նման մտածողությունը ստիպում է, որ «Հայաստանի զարգացման հեռանկարները» ընկալվի չակերտների մեջ և ոչ թե բովանդակային իմաստով: Ահա և մեզ ուղարկված հերքման տեքստը:
«Համաձայն «Զանգվածային լրատվության մասին» ՀՀ օրենքի 8-րդ հոդվածի՝ «Ժամանակ» օրաթերթին և 1in.am կայքին ներկայացվում է հերքման պահանջ՝ վերոնշյալ հոդվածի դրույթներին համապատասխան հրապարակելու նպատակով:
Հերքում
«Ժամանակ» օրաթերթի 2015թ. հունիսի 17-ի համարում և 1in.am կայքում (http://www.1in.am/1649127.html ) հրապարակված «Բաց երկնքի՞», թե՞ դատարկ երկնքի քաղաքականություն» խորագրով հրապարակման մեջ, հղում կատարելով «թերթի ունեցած տեղեկություններին», զրպարտանք պարունակող տեղեկատվություն է հրապարակվել, որտեղ շահարկվում է ՀՀ նախկին փոխվարչապետ և ներկայումս «Հայաստանի զարգացման նախաձեռնություններ» (IDeA) հիմնադրամի գլխավոր տնօրեն Արմեն Գևորգյանի անունը…
Հայտնում ենք, որ նշված հրապարակման մեջ տեղ գտած՝ Արմեն Գևորգյանին վերաբերող տեղեկությունները բացարձակ կեղծ են և որևէ կապ չունեն իրականության հետ:
«Հայաստանի զարգացման նախաձեռնություններ» (IDeA) հիմնադրամի
Հանրային կապերի բաժին
