Ադրբեջանական Apa լրատվական գործակալության փոխանցմամբ, Հունգարիայի խորհրդարանի օրակարգում է հայտնվել Լեռնային Ղարաբաղում «հայերի կողմից» ադրբեջանցիների նկատմամբ գործված «զանգվածային սպանությունների» նախագիծը: Դա, մասնավորապես, վերաբերում է 1992 թվականի փետրվարի 25-ի գիշերը «հայերի իրականացրած» Խոջալուի (Իվանյան) սպանդին, որին զոհ գնաց 613 մարդ:
Այս նախաձեռնության հեղինակը Հունգարիայի խորհրդարանում ներկայացված երրորդ խոշոր կուսակցությունն է`«Հանուն առավել լավ Հունգարիայի շարժումը» (Jobbik):
Նշվում է, որ հունգարական խորհրդարանը բաղկացած է 227 պատգամավորից, որոնցից 47-ը ներկայացնում է Jobbik-ը:
Հիշեցնենք, որ այն տարածքը, որտեղ 1992 թվականին զոհվեցին Խոջալուի բնակիչները, գտնվում էր ադրբեջանցիների վերահսկողության ներքո, ինչը նաշանակում է, որ ադրբեջանցիները մահացածներին և տեղանքը անսահմանափակ ու անարգել նկարահանելու հնարավորություն ունեին:
Հատկանշական է, որ ադրբեջանցի լրագրող Չինգիզ Մուսթաֆաևը հայտնվեց մարդկանց զոհվելու վայրում դեպքից անմիջապես հետո, և հենց նրա տեսանյութերը «հիմք հանդիսացան» Խոջալուի մասին ադրբեջանական վավերագրական նյութերի համար:
Ի դեպ, թուրքական լրատվամիջոցները մեծ ցնծությամբ են ընդունել այս լուրը` իրենց էջերում այն վերնագրելով հետևյալ կերպ. «Հունգարիան շոկի մեջ գցեց Հայաստանին»:
