Ինչպես հաղորդում է Interfax գործակալությունը, Wikileaks-ի հիմնադիր Ջուլիան Ասանժը ղազախական ընդդիմադիր Голос республики թերթին տված հարցազրույցի ժամանակ հայտարարել է, որ ուզում է օգնել Ղազախստանի քաղաքացիներին պայքարել երկրում կոռուպցիայի դեմ:
Թերթում հայտնել են, որ այս շաբաթ Wikileaks-ի ներկայացուցիչներն հրատարակչությանն առաջարկել են համագործակցություն նրա հիմնադրի հետ: Նախօրեին Wikleaks-ը համաձայնության է եկել նաև ղազախական լրատվական КазТАГ ընկերության հետ:
«Որպեսզի ներկայացված լինես ամբողջ տարածաշրջանում, պետք է ներկայացված լինես Ղազախստանում, որը համարվում է ամենազարգացածն այս երկրների մեջ: Եվ այս երկրի զարգացումով է մեծամասամբ պայմանավորված տարածաշրջանի այլ երկրների զարգացումը»,- ասել է Ասանժը` բացատրելով թե ինչու է Wikileaks-ը ցանկանում ներկայացված լինել այս երկրում:
Նա կարծում է, որ մեծ դեր ունի նաև Ղազախստանի աշխարհաքաղաքական դիրքը:
«Մի կողմից՝ հսկայական Ռուսաստանը, մյուս կողմից` Արևմտյան կայսրությունը, ինչպես նաև Չինաստանը, որը ծաղկող կայսրություն է՝ կառավարման բարդ համակարգով»,- ավելացրել է Ասանժը:
«Իշխանությունների ցանկացած գործողություն այս երկրներում ուղեկցվում են հիշյալ ուժերի կողմից որևէ արձագանքով: Իշխանությունների փորձերը՝ մանևրել այդ ուժերի միջև, երկրի ներսում կոռուպցիայի աճի հետևանքն են, քանի որ կողմերից յուրաքանչյուրը ցանկանում է պաշտպանել իր շահերը: Մենք ուզում ենք Ղազախստանի հասարակությանը տեղեկություններ հաղորդել, որպեսզի օգնենք նրան զսպել այդ ուժերին»,- ընդգծել է Ասանժը:
Միևնույն ժամանակ նա նշել է, որ իր կայքը պետք չէ համարել «Ղազախստանի հարցերով մասնագետ»: «Բայց մենք հավատում ենք, որ մարդիկ կարող են լուծել այդ խնդիրները: Մեր խնդիրը նրանց օգնելն է: Սակայն մարդիկ իրենք պետք է հասկանան, թե ինչ է կատարվում իրենց շուրջը»,- եզրափակել է Ասանժը:
