Քրիշտիանու Ռոնալդուի հեթ թրիքը Երևանում Հայաստանի և Պորտուգալիայի միջև շաբաթ օրը կայացած եվրաորակավորման խաղի միակ հիշարժան դեպքը չէր։ Այս մասին գրում է The Washington Post-ը՝ անդրադառնալով Շահեն Հարությունյանի՝ խաղադաշտ ներխուժմանը։
Ներխուժողի նպատակը ոչ թե մարզական ոլորտի գործակալների ուշադրությունը գրավելն էր, այլ բողոք արտահայտելը՝ երկրում քաղաքական բանտարկության դեմ և հատկապես իր հոր՝ Շանթ Հարությունյանի 6 տարվա ազատազրկման դեմ։ Հայրը գլխավորում է ազգայնական «Ցեղակրոն» կուսակցությունը՝ նշում է պարբերականը։
Շահենն ազատ արձակվելուց հետո լրագրողների հետ զրույցում իր ներխուժումը պարզաբանել էր հետևյալ կերպ. «Լավագույն ֆուտբոլիստներից մեկը դաշտում էր և աշխարհի ուշադրությունը կենտրոնացած էր նրա վրա։ Օգտվեցի առիթից ևս մեկ անգամ աշխարհին ցույց տալու, որ Հայաստանը քաղբանտարկյալներ ունի, և մենք պահանջում ենք ազատ արձակել նրանց»։
Հարությունյանը սկսել էր վազքը ցուցապաստառով, որի վրա գրված էր եղել. «Ազատություն Շանթ Հարությունյանին և այլ քաղբանտարկյալների»։ Նրա հագին եղել է հոր պատկերով վերնաշապիկ։
Նույն օրը ավելի վաղ երկու այլ անձինք դաշտ էին ներխուժել խաղից առաջ՝ մարզումների ժամանակ։ Երկու երեխաների ներխուժման շարժառիթը, սակայն, քաղաքական չէր, նրանք պարզապես ցանկացել էին հասնել Ռոնալդուին։ 30-ամյա պորտուգալացի սուպեր աստղը կարծես թե չի մտահոգվել անվտանգության խախտմամբ, նա նույնիսկ նրանցից մեկին գրկել է և ինքնագիր տվել։