Այսօր ՆԱՏՕ-ի գլխավոր քարտուղար Անդերս ֆոգ Ռասմուսենը ընդունել է, որ Հյուսիսատլանտյան դաշինքը կործանիչ ինքնաթիռների կարիք ունի Լիբիայում ռազմական գործողություններ իրականացնելիս: Այս մասին հաղորդում են եվրոպական լրատվամիջոցները: Նրանց տեղեկություններով, Ֆոգ Ռասմուսենն ակնկալում է, որ Իտալիան, Իսպանիան և Նիդերլանդները, որոնք այս պահին մասնակցում են միայն պարեկային առաքելության, կմասնակցեն նաև ցամաքային թիրախների վերացմանը:
Սակայն այսօր Իսպանիայի արտաքին գործերի նախարար Տրինիդադ Խիմենեսը ասել է, որ իր երկիրը 4 կործանիչ է տրամադրել այս գործողությունների համար ու չի պատրաստվում լրացուցիչ ռեսուրսներ տրամադրել:
Հայտնի է, որ «Միացյալ պաշտպան» անվանումը կրող գործողության համար ինքնաթիռների մոտ կեսը տրամադրել են Ֆրանսիան և Մեծ Բրիտանիան, իսկ մյուս կեսը` Կանադան, Բելգիան, Դանիան և Նորվեգիան: Ավելի վաղ ԱՄՆ-ն հայտարարել էր, որ դուրս է բերում իր 50 կործանիչ ինքնաթիռները` մասնակցելով միայն օդային տարածքները հսկելու աշխատանքներին:
