Անցած գիշեր Ֆրանսիայում մահկանացուն է կնքել Դիմադրության շարժման ականավոր մասնակից, Բուխենվալդի համակենտրոնացման ճամբարի կալանավոր, գրող և դիվանագետ Ստեֆան Հեսելը: Գրականագետն ու իրավապաշտպանը կյանքից հեռացել է 95 տարեկանում՝ փոխանցում է France 24-ը:
Հեսելը ծնվել է 1917 թվականի հոկտեմբերի 20-ին՝ Բեռլինում, հրեայի ընտանիքում: 1924 թվականին նա ծնողների հետ գաղթել է Ֆրանսիա, 1939 թվականին քաղաքացիություն է ստացել ու զորակոչվել բանակ:
Երկրորդ համաշխարհային պատերազմի մեկնարկին Հեսելը հրաժարվել է միանալ Վիշիի կառավարությանն ու սկսել է համագործակցել Դիմադրության շարժման ու անձամբ Շառլ դե Գոլի հետ: Կարճ ժամանակ անց նրան բռնել և ուղարկել են Բուխենվալդի համակենտրոնացման ճամբար: Գրողին մի քանի անգամ ճամբարից ճամբար են տեղափոխել, նա խուսափել է մահապատժից, պատերազմի ավարտը դիմավորել է Հանովերում:
Պատերազմից հետո Հեսելը Էլեոնորա Ռուզվելտի հետ մասնակցել է Մարդու իրավունքների համընդհանուր հռչակագրի խմբագրմանը: Հռչակագիրը ՄԱԿ-ի կողմից ընդունվել է 1948 թվականին: Նա ակտիվորեն զբաղվել է դիվանագիտական աշխատանքով, զբաղվել ապագա դեսպանների պատրաստմամբ, եղել դիվանագիտական առաքելությունների անդամ:
Իր ծառայությունների համար նա պարգևատրվել է Պատվավոր լեգիոնի շքանշանով և Մեծ խաչով: Կյանքի վերջին շրջանում ակտիվ մասնակցություն է ունեցել Ֆրանսիայի հասարակական կյանքում:
