Թուրքական Doğan լրատվական գործակալության փոխանցմամբ՝ ԱՄՆ պետդեպարտամենտի մամլո քարտուղարի պաշտոնակատար Մարի Հարֆը Վաշինգտոնում լրագրողների հետ զրույցում մեկնաբանել է Էրդողանի սկանդալային վերջին հայտարարությունները:
Լրագրողները Հարֆին հիշեցրել են, որ Էրդողանը վերջին օրերին արևմտյան ԶԼՄ-ներին և մասնավորապես CNN-ին, New York Times-ին ու BBC-ին մեղադրել է Թուրքիան թուլացնելու և մասնատելու փորձերի համար, ինչպես նաև «խռովարարներ» է որակել հայերին, լրագրողներին ու ԼԳՏԲ-ի ներկայացուցիչներին:
Հարֆը հայտարարել է. «Երբ խոսքը լրագրողների մասին է, բնականաբար, ԱՄՆ-ն աջակցում է ազատ արտահայտվելուն, և մենք մտահոգված ենք Թուրքիայի կառավարության կողմից ազատ արտահայտվելու գործընթացին միջամտելու կապակցությամբ:
Մենք երկար ժամանակ արտահայտվում ենք այս մասին: Անկախ և ինքնուրույն մամուլը ժողովրդավարության ու բաց հասարակության հիմնաքարերից մեկն է: Թուրքիան մեր բարեկամն է և ՆԱՏՕ-ի գծով դաշնակիցը, և մենք Թուրքիային կոչ ենք անում պահպանել ժողովրդավարության չափանիշները»:
Հարֆը հայտարարել է, որ իրենք բնականաբար դատապարտում են հայերի, լրագրողների ու ԼԳՏԲ-ի ներկայացուցիչների վերաբերյալ Էրդողանի հայտարարությունը:
Հիշեցնենք, որ 2011 թվականի ամռանը Թուրքիայում տեղի ունեցած խորհրդարանական ընտրություններից առաջ Էրդողանը «այլանդակ» որակեց Կարսում հայ-թուրքական բարեկամությունը խորհրդանշող հուշարձանը և կարգադրեց ապամոնտաժել այն, ինչը, ի դեպ, սկսվեց ապրիլի 24-ին:
Էրդողանը դրանով մտադիր էր ստանալ ազգայնամոլների քվեները, որոնց թիվը հաշվվում է միլիոններով, մինչդեռ Թուրքիայի հայ համայնքը մեծաթիվ չէ, ինչի համար էլ Էրդողանը չի զգում նրա համակրանքը շահելու կարիքը: Էրդողանն իր այս «մարտավարությունը» կիրառում է նաև ներկայիս ընտրություններից առաջ: Քանի որ Թուրքիայում, շատերի կարծիքով, իշխող «Արդարություն ու զարգացում» կուսակցությունը (ԱԶԿ) դարձել է երկրի ամենաազգայնական կուսակցությունը, ուստի և նման տրամադրություններ ունեցողները դժվարանում են ընտրություն կատարել ԱԶԿ-ի և խորհրդարանական երրորդ խոշոր ուժի՝ «Ազգայնական շարժում» կուսակցության (ԱՇԿ) միջև:
