Բարբի տիկնիկին 56 տարվա մեջ առաջին անգամ թողել են առանց բարձրակրունկների: Mattel ընկերությունը տիկնիկի կառուցվածքի մեջ փոփոխություններ է կատարել, որպեսզի նա կարողանա հագնել նաև ցածր կոշիկ, հայտնում է The Daily Mail-ը:
Տիկնիկը կկարողանա փոխել բարձրակրունկները սպորտային կոշիկներով հատուկ գնդիկների շնորհիվ, որոնք տեղադրված են նրա կոճերի մեջ՝ ոտնաթաթը շարժական դարձնելու նպատակով:
Ավելի վաղ բարբին արտադրվում էր ոտնաթաթերի անշարժ կառուցվածքով, որը թույլ էր տալիս նրան հագնել միայն բարձրակրունկներ:
Նոր բարբին հայտնվել է Fashionista շարքում: Ընկերությունը խոստանում է նաև, որ այդ տիկնիկների շարքը կթողարկվի մաշկի 6 գույնի, մազերի 23 նրբերանգների և նույն քանակությամբ սանրվածքների տարբերակներով: Բացի այդ, ընկերությունը մտադիր է տիկնիկներին տալ դեմքի 14 ձևեր և հաճախորդներին առաջարկել աչքերի 18 գույնի ընտրություն:
