Հայաստանի ազգային հավաքականի թեկնածու Դավիդ Յուրչենկոն «Спорт День за Днем» կայքի քվեարկության արդյունքում ճանաչվել է Ռուսաստանի 14/15 մրցաշրջանի լավագույն դարպասապահը: Այս առիթով ռուսական կայքի լրագրողները հարցազրույց են ունեցել Յուրչենկոյի հետ:
– Համաձա՞յն եք, որ այս մրցաշրջանը Ձեր կարիերայում լավագույնն էր:
– Չի կարելի ասել, որ լավագույնն էր: Մեծ փորձ եմ ձեռք բերել, որի շնորհիվ կարողացել եմ լավ մրցաշրջան անցկացնել: Կարծում եմ, որ լավագույն տարիներս դեռ առջևում են:
– Հաջորդ մրցաշրջանում Դուք հանդես կգաք «ՈւՖԱ»-ո՞ւմ, թե՞ կան այլ առաջարկներ:
– Ունեմ գործող պայմանագիր «ՈւՖԱ»-ի հետ, իսկ այն, թե ինչ կլինի մեկ ամսից, դեռ չգիտեմ: Ներկա պահին ես կապված եմ Ուֆայի հետ: Ինչ կլինի հետո` ժամանակը ցույց կտա:
– Երազո՞ւմ եք Ռուսաստանի ազգային հավաքականի մասին, թե՞ դիտարկում եք Հայաստանի ընտրանու առաջարկը:
– Չեմ երազում, սակայն ցանկանում եմ հայտնվել Ռուսաստանի հավաքականում: Կարծում եմ, որ շատերն են տեսնում և գնահատում իմ խաղը: Ձեր կայքը նույնպես ինձ լավագույնը ճանաչեց: Ես փորձում եմ լինել միշտ առաջինը: Իհարկե, Հայաստանի հավաքականից հրավեր ստացել եմ, սակայն դեռ ոչ մի հստակ պատասխան չեմ տվել: Խնդիրն այն է, որ դեռ որոշում չի կայացվել Ռուսաստանի առաջնության լեգեոներների հարցով: Եթե սահմանափակումը խստացվի, ապա ինձ համար անհարմար կլինի: Եվրոպայից առաջարկներ չկան, իսկ տեղի ակումբի համար լեգեոներ-դարպասապահ ունենալը ճոխություն կլինի:
