«Հաբբլ» աստղադիտակի միջոցով ստացված տվյալները վկայում են Պլուտոն մոլորակը շրջապատող արբանյակների՝ իրենց ուղեծրերով քաոսային շարժումների մասին: RIA Novosti-ի հաղորդմամբ՝ այս մասին ճեպազրույցի ժամանակ հայտնել է NASA-ի ներկայացուցիչ Ջոն Գրանսֆիլդը:
NASA-ի գիտնականները նշում են, որ Պլուտոնի բնական արբանյակներ Նիքթն ու Հիդրան շարժվում են իրենց ուղեծրերով՝ տարբեր ուղղություններով պտտվելով, օրորվելով ու մշտապես շրջվելով: «Եթե դուք ապրեիք Պլուտոնի արբանյակներից մեկի վրա, ձեզ համար դժվար կլիներ իմանալ՝ երբ կամ որտեղից արևը կծագի ամեն նոր օր»,- բացահայտման հետ կապված ասել են NASA-ում:
NASA-ի հետազոտող Մարկ Շոուոլթերի խոսքով՝ Նիքթի ու Հիդրայի քաոսային շարժումները պայմանավորված են ձգողական դաշտի՝ կրկնակի մոլորակի պտտվելու ժամանակ ստեղծված փոփոխություններով, որը կազմավորում են Պլուտոնն ու դրա ամենամեծ արբանյակ Հարոնը:
Հետազոտողները վստահ են, որ Պլուտոնի արբանյակների ձևի, մակերևույթի և շարժման մասին նոր տվյալներ կստացվեն Պլուտոնի կողքով NASA-ի New Horizons տիեզերական սարքի թռիչքի ժամանակ: Ծրագրվում է, որ սարքը Պլուտոնին ամենամոտ կետին կհասնի հուլիսի 14-ին:
