Forrights.am–ը գրում է. «Վազգեն Սարգսյանի անվան Ռազմական ինստիտուտի կուրսանտ Հայկազ Բարսեղյանի սպանության գիշերը մայրն անսպասելի վեր է թռել քնից վախի զգացումով. Հայկազին գիշերն են սպանել.
«Ժամը 4:10-ին կինս վեր թռավ, ինձ թվում է՝ հենց էդ ժամին էլ սպանել են տղայիս»,- ասում է Հայկազի հայրը՝ Արկադի Բարսեղյանը: Տղայի մահից հետո մոր մոտ առողջական խնդիրներ են առաջացել. այսօր նա սրտային խնդիրներով հայտնվել է հիվանդանոցում:
«Հայկազի դեպքից առաջ կինս սրտի խնդիր չուներ, մայր է, չի դիմանում, տարել ենք հիվանդանոց: Փոքր տղաս էլ անհանգիստ է, գիշերներն արթնանում է ու գալիս է մեզ մոտ: Մի քանի անգամ երազում Հայկազին էր տեսել…իրենք շատ կապված էին»,- ասում է երեք որդիների հայրը:
19-ամյա Հայկազը ծնվել է Ուկրաինայում, ավագ որդու ծննդից տարիներ անց ընտանիքը վերադարձել է հայրենիք: «Ինքը մանկուց ուզում էր զինվոր դառնալ, իսկապես սիրել է զինվորական գործը, նա արդեն պատրաստի սպա էր այս բանակի համար»,- ասում է հայրը և ավելացնում, զավակներին հայրենասիրական ոգով են դաստիարակել:
«Հայկազը մեր հայրենասիրությանը զոհ դարձավ, մենք չենք ուզել ուրիշ տեղ ապրել, ծնողներս Ռուսաստանում են, մեզ կանչում էին իրենց մոտ, բայց ասում էի՝ ես երեք տղա ունեմ, երեք զինվորի ո՞նց կտրեմ հայրենիքից»:
Հայկազը սովորել է Մոնթե Մելքոնյանի անվան ռազմական վարժարանում, բանակ զորակոչվելուց 8 ամիս անց իր դիմումի համաձայն ընդունվել է Վազգեն Սարգսյանի անվան ռազմական ինստիտուտ:
2015 թվականի հունվարի 29-ի առավոտյան, 19-ամյա Հայկազ Բարսեղյանի մարմինը գտել են ինստիտուտի մարզահրապարակի պտտաձողից կախված: Նախնական վարկածը ինքնասպանությունն է եղել, սակայն կարճ ժամանակ անց ինստիտուտի 4 կուրսանտներ կալանքի են վերցվել: Պտտաձողից կախված Հայկազի ոտքերը գետնից կտրված չեն եղել. ինքնասպանության վարկածը շատ արագ հօդս է ցնդել:
«Ամեն տարի հունվարի 28-ին սահմանում անհանգիստ վիճակ է լինում, մենք առավոտյան լուրերը նայեցինք ու իմացանք, որ զոհ չի եղել այս տարի, ես ու կինս ուրախացանք, չգիտեինք, որ լուսադեմին արդեն մեր տղայի դիակն են գտել»,- ասում է հայրը:
Հայկազի սպանության մեջ են կասկածվում ինստիտուտի 4 կուրսանտներ, որոնք ըստ Արկադի Բարսեղյանի, վախի մթնոլորտ են ստեղծել և փորձել են ճնշել մյուսներին:
Մանրամասները՝ սկզբնաղբյուր կայքում
