ԵԱՀԿ-ի պաշտոնական կայքի փոխանցմամբ, ԵԱՀԿ Մինսկի խմբի համանախագահներ Բեռնար Ֆասիեն (Ֆրանսիա), Իգոր Պոպովը (Ռուսաստան) և Ռոբերտ Բրադկեն (ԱՄՆ), որոնք ապրիլի 11-14-ին գտնվել են Հայաստանում, Ղարաբաղում ու Ադրբեջանում, այսօր մի հայտարարություն են տարածել.
«ԵԱՀԿ Մինսկի խմբի համանախագահներն ապրիլի 11-14-ին այցելել են Երևան, Լեռնային Ղարաբաղ և Բաքու: Այդ այցի շրջանակներում նրանք հանդիպումներ են ունեցել Հայաստանի նախագահ Սերժ Սարգսյանի, Ադրբեջանի նախագահ Իլհամ Ալիևի և Լեռնային Ղարաբաղի դե ֆակտո գոյություն ունեցող իշխանությունների հետ:
Հանդիպումների ժամանակ համանախագահները քննարկել են հետագա քայլերը` ղարաբաղյան հակամարտության կարգավորմանն առնչվող բազային սկզբունքների համաձայնության հասնելու շուրջ: Ժամանակն է, որ վերջնականապես հստակեցվեն և համաձայնեցվեն դրանք, ինչից հետո կարելի կլինի անցում կատարել խաղաղ համաձայնության մշակմանը:
Բաքու այցելելուց առաջ` ապրիլի 13-ին, համանախագահները ոտքով հատել են շփման գիծը: Այդպիսի դեպք գրանցվել էր նաև 2010 թվականի սեպտեմբերին: Դա ուղղված է 1994 թվականին կնքված զինադադարի ռեժիմի պահպանմանն ու ամրագրմանը, ինչպես նաև նրան, որ այդ գիծը չպետք է արգելք հանդիսանա երկու հարևան ժողովուրդների միջև: Դրանով համանախագահները ցույց տվեցին, որ անհրաժեշտ է այցելել հակամարտության մեջ ներգրավված բոլոր շրջաններ:
Շփման գծի հատումից հետո համանախագահները այցելել են նաև հարավարևմտյան շրջանում գտնվող Թարթառ քաղաք, ինչպես նաև Օրթա Քարվենդ գյուղ, ուր մարտի 8-ին միջադեպ էր գրանցվել:
Հենվելով մարտի 5-ին Սոչիում կայացած Հայաստանի, Ադրբեջանի ու Ռուսաստանի նախագահների հանդիպման ժամանակ արված հայտարարության վրա` համանախագահները նաև կողմերին ներկայացրել են շփման գծի միջադեպերի հետաքննման մեխանիզմ, որին պետք է մասնակցեն բոլոր կողմերը:
Համանախագահները կշարունակեն աշխատել կողմերի հետ` հնարավորինս թափանցիկ և օբյեկտիվ հետաքննություն ապահովելու համար: Դա հակամարտող կողմերի միջև կմեծացնի վստահությունը, կնվազեցնի սխալների քանակը և կփրկի զինծառայողների կյանքը:
Միևնույն ժամանակ, համանախագահներն անհանգստացած են Լեռնային Ղարաբաղում պլանավորած օդանավակայանի բացումից, ինչը կարող է հանգեցնել լարվածության աճի: Նրանք զգուշացրել են, որ այդ օդանավակայանի հետ կապված թռիչքները չեն կարող նպաստել միջազգային իրավունքի շրջանակներում Լեռնային Ղարաբաղի ներկայիս կարգավիճակի փոփոխությանը: Համանախագահները կողմերին կոչ են արել այդ հարցում հասնել փոխհամաձայնության` պահպանելով միջազգային կոնվենցիաներն ու համաձայնագրերը:
Համանախագահները ողջունում են հակամարտող կողմերի հավաստիացումներն այն մասին, որ զերծ կմնան քաղաքացիական ինքնաթիռների դեմ հարձակումներ գործելուց, կզբաղվեն խնդրի դիվանագիտական լուծմամբ և չեն քաղաքականացնի այդ հարցը:
Ապրիլի վերջին համանախագահները մտադիր են այցելել Վաշինգտոն` ղարաբաղյան հակամարտության կարգավորման հարցում առաջընթաց գրանցելու նպատակով ամերիկյան բարձրաստիճան պաշտոնյաների հետ խորհրդակցելու համար»: