Իրանն ուսումնասիրում է սեփական գազը Եվրոպա փոխադրելու 5-6 երթուղի, ինչը պետք է տեղի ունենա միջազգային պատժամիջոցների վերացումից հետո:
RIA Novosti-ի փոխանցմամբ՝ այս մասին Փարիզում տեղի ունեցած Գազի համաշխարհային կոնգրեսում հայտարարել է Իրանական ազգային գազային ընկերության (NIGC) միջազգային կապերի գծով տնօրեն Ազիզոլլահ Ռամազանին։
«Իրանն ուսումնասիրում է Եվրոպային գազ մատակարարելու բազմաթիվ ճանապարհներ, հնարավոր է՝ 5-6 ուղի: Դրանցից մեկը հնարավոր է՝ անցնի Թուրքիայի տարածքով, մյուսը՝ Սև ծովով, մեկ այլ ուղին՝ Իրաքի, Սիրիայի ու Միջերկրական ծովի միջոցով:
Սակայն այդ ուղիները պետք է ուսումնասիրվեն նորմերին համաձայն: Անհրաժեշտ է ուսումնասիրրել տնտեսական նպատակահարմարությունն ու հստակեցնել լավագույն երթուղին»,- ասել է նա:
Վերջինս ընդգծել է, որ իրանական կողմն արդեն իսկ սկսել է հնարավոր երթուղիների ուսումնասիրությունը, սակայն որոշումը կարող է ընդունվել միայն այն ժամանակ, երբ սպառողը՝ եվրոպացիները, կկարողանան ստորագրել պայմանագրեր, այսինքն՝ դա տեղի կունենա Իրանի դեմ սահմանված պատժամիջոցների վերացումից հետո:
Ինչպես ընդգծել է Ռամազանին, այդ երթուղիներից երեքն են հիմնական, սակայն կարող են լինել նաև շեղումներ. «Օրինակ՝ եթե դուք ցանկանում եք գազն անցկացնել Թուրքիայի տարածքով, ապա կարող են լինել երկրի ներսում մի շարք երթուղիներ: Դա կախված է նրանից, թե ինչպես է այդ գազատարը մատակարարելու Թուրքիային, իսկ հետո գնալու դեպի Եվրոպա, որովհետև Թուրքիան բնական գազի խոշոր սպառող է»:
