Ուկրաինայի արևելքում ընթացող հակամարտությունում անցած տարվա ապրիլի կեսերից մինչ այս տարվա մայիսի 30-ը զոհվել է առնվազն 6417 մարդ, վիրավորվել 15 հազար 962-ը։ Այս տվյալները հրապարակվել են Ժնևում մարդու իրավունքների հարցերով ՄԱԿ-ի գերագույն հանձնակատարի գրասենյակի կողմից՝ փոխանցում է TASS գործակալությունը։
Նշվում է, որ խոսքը «պաշտոնական գնահատականների մասին է», և որ զոհերի ու վիրավորների իրական թիվը կարող է զգալի ավել լինել։
Զեկույցը պատրաստող ՄԱԿ-ի մոնիտորինգային առաքելությունը հավաքել է մարդու իրավունքների լուրջ խախտումների բազմաթիվ վկայություններ, ներառյալ բնակավայրերի գնդակոծությունների, մահապատիժների, կամային և անօրինական ձերբակալությունների, վատ վերաբերմունքի և սոցիալա-տնտեսական իրավունքների զրկման։
Փաստաթղթում ընդգծվում է, որ հրադադարի ռեժիմը պահպանվում է ոչ ամբողջությամբ։
Մարտական գործողությունները ավերիչ ազդեցություն են ունեցել և ունենում 5 մլն մարդկանց կյանքի ու իրավունքների վրա։
Փաստաթղթում նաև հաղորդում է, որ մարդու իրավունքների խախտումներ են գրանցվում ինչպես Կիևի կողմից վերահսկվող, այնպես էլ նրա վերահսկողությունից դուրս գտնվող տարածքներում։
Մայիսի 20-ին Ուկրաինայի նախագահ Պյոտր Պորոշենկոն հայտնել էր, որ ուժային գործողության անցկացման ընթացքում զոհվել են 1800 ուկրաինացի զինվորներ և 7000 խաղաղ բնակիչներ։
