Փետրվարի 25-ին Կենտրոնական ընտրական հանձնաժողովը` հիմք ընդունելով ընտրական տեղամասերում քվեարկության արդյունքների վերաբերյալ արձանագրությունները և վերահաշվարկի արդյունքները, կամփոփի ՀՀ նախագահի փետրվարի 18-ի ընտրությունների քվեարկության արդյունքները և դրանց վերաբերյալ կընդունի որոշում:
Վերջնական արդյունքներն, ըստ ամենայնի, նախնական արդյունքներից էապես չեն տարբերվի:
Ինչպես «Pastinfo.am»-ն ավելի վաղ հայտնել էր, քվեարկության արդյունքների վերահաշվարկի և քվեարկության արդյունքներն անվավեր ճանաչելու մասին սահմանված ժամկետում թ.թ. 2, 3 և 5 ԸԸՀ-ները ստացել էին 10 ընտրական տեղամասերի քվեարկության արդյունքների վերահաշվարկի և քվեարկության արդյունքներն անվավեր ճանաչելու 47 դիմումներ:
Արդյունքում` վերահաշվարկ է կատարվել միայն 3 ընտրատեղամասերում, ինչից հետո արձանագրվել է թեկնածուների քվեների աննշան փոփոխություն:
ԸԸՀ-ների կողմից մնացած 7 ընտրատեղամասերում վերահաշվարկի պահանջը մերժվել է` ոչ իրավասու անձանց կողմից դիմում ներկայացնելու, իսկ 47 ընտրատեղամասերում քվեարկության արդյունքներն անվավեր ճանաչելը` անհիմն լինելու պատճառաբանությամբ:
Ր.Հովհաննիսյանի ընտրական շտաբի և «Ժառանգություն» կուսակցության մամուլի խոսնակ Հովսեփ Խուրշուդյանը փետրվարի 24-ի ասուլիսում, մասնավորապես, նշել էր, որ այն ընտրատեղամասերում, որտեղ գրանցվել է ընտրողների բարձր մասնակցություն, մեծ տոկոս են կազմում Սերժ Սարգսյանի քվեները: Ըստ նրա, դա ապացուցում է, որ այդ ընտրատեղամասերում տեղի են ունեցել լցոնումներ, կրկնակի քվեարկություններ, սակայն ընտրատարածքային ընտրական հանձնաժողովները մերժել են բացել ընտրողների ցուցակները: Դա, նրա համոզմամբ, կփաստեր, որ «քվեարկել» են հանրապետությունից բացակայող հազարավոր քաղաքացիներ:
Հիշեցնենք, որ ԿԸՀ-ի կողմից ամփոփված նախնական արդյունքերի համաձայն`քվեարկությանը մասնակցել է 1 մլն 521 հազար 931 ընտրող կամ ընտրողների ընդհանուր թվի 60,18 տոկոսը: Սերժ Սարգսյանի օգտին քվեարկել է 861 378 ընտրող կամ 58,64 տոկոսը, Րաֆֆի Հովհաննիսյանի օգտին` 539 674 ընտրող կամ 36,74 տոկոսը, Հրանտ Բագրատյանի օգտին` 31 643 ընտրող կամ 2,15 տոկոսը, Պարույր Հայրիկյանի օգտին` 18 093 ընտրող կամ 1,23 տոկոսը: Մնացած 3 թեկնածուները` Անդրիաս Ղուկասյանը, Վարդան Սեդրակյանը և Արման Մելիքյանը, ստացել են 1 տոկոսից պակաս քվեներ: 50 992 քվեաթերթիկ ճանաչվել է անվավեր:
