Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում Լևոն Ավետիսյանի նախագահությամբ սկսվեց Դավիթ Իսպիրյանի գործի դատական քննությունը:
Դեպքը տեղի է ունեցել մոտ չորս տարի առաջ:
32-ամյա Դավիթը բարձրագույն կրթություն ունի, ամուսնացած չէ: Ըստ մեղադրանքի՝ նա քննությամբ չպարզված հանգամանքներում և ժամանակահատվածում ապօրինի կերպով ձեռք է բերել ու պահել հրազեն հանդիսացող ատրճանակ:
2011 թվականի հունիսի 24-ին մեքենայով երթևեկելիս Դավիթը բախվել է տաքսի ծառայության մի մեքենայի: Բախման մասնակից վարորդները իջել են՝ կատարված պատահարը քննարկելու: Դավիթը տաքսու վարորդին գումար է առաջարկել՝ պատճառած նյութական վնասը տեղում հատուցելու նպատակով: Բայց տաքսու վարորդի հետ համաձայնություն չի կայացել:
Տաքսու վարորդն առաջարկել է խոսակցությունը շարունակել իրենց ծառայության գրասենյակի մոտ:
Գրասենյակը գտնվել է Կիևյան փողոցի շենքերից մեկի բակում: Դավիթի ու տաքսու վարորդի խոսակցությունը գրասենյակի մոտ նույնպես չի ստացվել: Մոտեցել են տաքսի ծառայության աշխատողները: Վեճը թեժացել է այն աստիճան, որ հնչել են կրակոցներ:
Առաջադրված մեղադրանքի համաձայն՝ Դավիթը կոպիտ կերպով խախտել է հասարակական կարգը, ապա Արթուր Ղ.-ին կյանքից զրկելու դիտավորությամբ, խուլիգանական դրդումներով իր մոտ ապօրինի պահվող հրազենից կրակոցներ է արձակել նրա ուղղությամբ, սակայն հանցագործությունն ավարտին չի հասցրել իր կամքից անկախ հանգամանքների բերումով:
Դեպքից հետո Դավիթ Իսպիրյանը գտնվել է հետախուզման մեջ: Ըստ մեղադրանքի՝ նա 2015 թվականի հունվարի 21-ին Ուկրաինայի քաղաքացու կեղծ անձնագրով ապօրինի հատել է ՀՀ սահմանը և մուտք է գործել Հայաստան:
Դավիթ Իսպիրյանը, այսպիսով, մեղադրվում է խուլիգանական դրդումներով սպանության փորձ կատարելու, ապօրինի հրազեն ձեռք բերելու, պահելու, զենքի գործադրմամբ խուլիգանություն կատարելու համար՝ ՀՀ քրեական օրենսգրքի 34-104 հոդվածի 2-րդ մասի 10-րդ կետով, 235 հոդվածի 1-ին մասով, 258 հոդվածի 4-րդ մասով:
Նախաքննության ընթացքում Դավիթ Իսպիրյանն իրեն մեղավոր չի ճանաչել մասնավորապես՝ խուլիգանական դրդումներով սպանության փորձի մեղադրանքով՝ տուժողին սպանելու դիտավորություն չունենալու հիմնավորմամբ:
Գործով 2 տուժող կա և 12 վկա, որոնցից դատարան էր ներկայացել միայն մեկ վկա: Տուժողներից՝ Արթուր Ղ.-ն տեղեկացրել էր դատարանին, որ վատառողջ է:
Դատարանը դատաքննությունը կսկսի հաջորդ նիստին՝ հունիսի 22-ին:
