«Մութ ժամեր» ակցիայի նախաձեռնող խումբը հայտարարություն է տարածել, որում մասնավորապես ասվում է. «Արդեն չորս օր է, ինչ համացանցում լայն արձագանք է գտել «Մութ ժամեր. 2 ժամով հրաժարվում ենք էլեկտրաէներգիայից» ակցիան: Ակցիայի ժամանակ՝ մայիսի 25-ին ժամը 21:00-ից մինչև 23:00-ն կոչ ենք անում հրաժարվել էլեկտրաէներգիայի սպառումից` զգուշացնելով «Հայաստանի էլեկտրական ցանցեր» ընկերությանը և թանկացման նրանց հայտը քննարկող պատկան մարմիններին, որ այս ակցիաները կարող են կրել պարբերական բնույթ՝ զրկելով ընկերությանը մեծ եկամուտներից:
Ակցիայի կազմակերպիչները դիմել են մի շարք լրատվամիջոցների` կոչ անելով աջակցել գաղափարին: 1in.am, Orer.am, Սիվիլնեթ, Araratnews.am, А1plus, ilur, Lragir.am կայքերը, Հայկական ժամանակ, Հրապարակ և Ժողովուրդ օրաթերթերի կայքերը միացել են ակցիային և նշված օրը մոտ երկու ժամով դուրս կգան «համացանցային եթերից» և չեն թարմացնի կայքերը` միաժամանակ տեղեկացնելով օգտատերերին այդ ակցիայի մասին: Ավելին, Gala TV հեռուստաալիքը նշյալ ժամերին կանջատի եթերը: Ակցիայի նախաձեռնող խումբը կոչ է անում մյուս լրատվամիջոցներին նույնպես միանալ այս ակցիային` ապահովելով դրա հանրայնացումը և արդյունավետ դարձնելով էլեկտարէներգիայի թանկացման դեմ պայքարը:
Նախաձեռնող խումբը միաժամանակ կոչ է անում սոցիալական ցանցի օգտատերերին նույնպես մասնակցել այս ակցիային, տարածել դրա մասին տեղեկությունները, մայիսի 25-ին ժամը 21:00-23:00-ին հրաժարվել էլեկտրաէներգիայի սպառումից: Ֆեյսբուքյան մեր էջում (www.facebook.com/events/1434908380160039) պատմե՛ք այս ակցիային Ձեր մասնկացության մասին, տեղադրե՛ք «մութ ժամերին» ձեր զբաղմունքի մասին պատմող տեսանյութեր և լուսանկարներ:
Պետական ձեռնարկությունների, մասնավոր ընկերությունների աշխատակիցներին կոչ ենք անում երեկոյան աշխատանքից հեռանալիս անջատել էլեկտրականությունից սնվող բոլոր հնարավոր սարքերը՝ դրանով աջակցելով ակցիային:
Վստահ ենք, որ ակցիային բազմաթիվ սպառողների ակտիվ մասնակցությունը կարող է ունենալ մեծ արդյունք հետագա պայքարի համար և կանխի սակագնի թանկացումը:
