Չնայած մենք ամեն օր օգտվում ենք սմարթֆոններից և այլ սարքերից, սակայն շատերի մոտ դեռ մնում են սխալ կարծիքներ նրանց աշխատանքի վերաբերյալ: bigpicture.ru-ն ներկայացնում է մի քանի տարածված տեխնիկական առասպելներ:
1. Mac-երը չեն վարակվում վիրուսով:
Չնայած Apple համակարգիչները ավելի հուսալի են վիրուսների հարցում, քան Windows համակարգիչները, սակայն Apple-ը նույնպես վարակվում է վիրուսներով, որի թարմ օրինակ է 2012 թվականին հազարավոր Mac համակարգիչների Տրոյան վիրուսով վարակվելը:
2. Եթե բրաուզերը բացեք անտեսանելի ռեժիմով, ապա ամբողջական գաղտնիությունը երաշխավորվում է:
Եթե դուք Google Chrome-ն օգտագործում եք անտեսանելի ռեժիմով (կամ Safari բրաուզերը մասնավոր ռեժիմով), դա նշանակում է, որ պարզապես բրաուզերում չի պահպանվի պատմությունը: Իհարկե, դա լավ է, եթե դուք ցանկանում եք, որպեսզի չերևա, թե դուք ինչ կայքերից եք օգտվել, սակայն կայքերում ձեր «անձը» մնում է բաց:
3. Հեռախոսը ամբողջ գիշեր լիցքավորելը փչացնում է մարտկոցը
Ժամանակակից սմարթֆոնները աշխատում են լիթիում-իոնային մարտկոցներով, որոնք բավականին «խելացի» են և դադարում են լիցքավորվել, երբ այլևս անհրաժեշտ չէ:
4. Հեռախոսը պետք է լիցքավորել, երբ այն համարյա ամբողջությամբ լիցքաթափված է:
Եվս մեկ սխալ կարծիք: Ցանկացած քանակի լիցք ունենալու դեպքում հանգիստ կարող եք լիցքավորել հեռախոսը:
5. Որքան շատ մեգապիքսելներ ունի տեսախցիկը, այնքան ավելի լավն է:
Պարզվում է, որ այդքան մեծ տարբերություն չկա, թե քանի մեգապիքսել ունի ձեր ֆոտոխցիկը: Պատկերի որակը ավելի շատ կախված է նրանից, թե որքան լույս կարող է ընդունել հաղորդիչը: Նշանակություն ունի պիքսելների չափսը, ոչ թե դրանց քանակը:
6. Սմարթֆոնի դիսփլեյի բարձր կետայնությունը միշտ լավ է
Ավելի կարևոր է էկրանի պայծառությունը, քան կետայնությունը:
7. Չի կարելի iPhone-ը լիցքավորել iPad-ի լիցքավորիչով
Ընդհանրապես կարելի է, սակայն ոչ մշտապես: Միշտ դրանով լիցքավորելու դեպքում մոտ մի տարի հետո կարող է թեթև տարբերություն զգացվել:
8. Չի կարելի համակարգիչը միացնել ամեն օր
Ինչ-որ մեկը համարում է, որ ամեն գիշեր համակարգիչը անջատելը վնասակար է: Բայց իրականում դա նույնիսկ լավ է: Այդ դեպքում կտնտեսեք էլեկտրաէներգիա և նրա էլեկտրոնային կոմպոնենտները կպահպանեք ավելի երկար:
9. Համակարգչի մոտ դրված մագնիսը կջնջի բոլոր տվյալները
Տեխնիկապես դա այդպես է, սակայն ժամանակակից համակարգիչների կոշտ սկավառակները կարող են տուժել միայն շատ հզոր ֆոկուսացված մագնիսներից: Իսկ ձեր մագնիսը դրան պարզապես ընդունակ չէ:
10. Բջջային հեռախոսի հաճախակի օգտագործումը առաջացնում է գլխի քաղցկեղ
Չնայած բջջային հեռախոսները ճառագայթում են, որոնք կարող են ներթափանցել մարդկային հյուսվածքները, սակայն ապացուցված չի, որ այն կարող է քաղցկեղ առաջացնել:
11. Որքան շատ են ազդանշանային գծիկները, այնքան լավն է կապը
Դա օգնում է, բայց չի երաշխավորում: Այդ գծիկները ցույց են տալիս, թե ինչքան մոտ եք գտնվում մոտակա կայանին: Կան այլ գործոններ, որոնք կարող են ազդել հեռախոսի համացանցի արագության վրա, օրինակ՝ տվյալ պահին ցանցից օգտվողների քանակը:
