Այն որ գլխավոր դատախազ Գևորգ Կոստանյանը ստանձնել է հանցագործությունների կիզակետում հայտնված Սուրիկ Խաչատրյանի և իր մերձավորների անձնական պաշտպանի գործը, դա նորություն չէր, բայց որ իրեն վերապահել է արդեն Սերժ Սարգսյանի խմբագրի աշխատանքը, արդեն սա ուշագրավ է: Կոստանյանն այսօր փորձում էր լրագրողներին մոլորեցնել՝ Սերժ Սարգսյանի՝ Գագիկ Ծառուկյանին նվիրված փետրվարյան հայտնի ելույթը աղավաղված ներկայացնելով: Թեև Սերժ Սարգսյանը շատ հստակ տարանջատել էր Ծառուկյանի թե՛ հարկային դաշտում թույլ տված թերացումները, թե՛ քրեական հանցագործությունները, սակայն Հովիկ Աբրահամյանն ու Կոստանյանը միաբերան փորձում են համոզել, որ Սերժ Սարգսյանը նկատի է ունեցել տնտեսական բնույթի հանցագործություններ:
Այսօր Աժ նիստից հետո, լրագրողների հետ ճեպազրույցում «Առաջին լրատվական»-ը Կոստանյանից հետաքրքրվեց, թե Սերժ Սարգսյանը դեռեւս փետրվարին ի լուր ողջ աշխարհի հայտարարեց ու խոստացավ հանձնարարել իրավապահ մարմիններին ստուգել օդում կախված բազմաթիվ քրեական հանցագործությունների մասին չստուգված լուրերը, արդյոք այս ընթացքում լծվել է նշված գործերի ուսումնասիրությանը և եթե՝ այո, ի՞նչ է բացահայտել. «Ես իրականացնում եմ իմ բոլոր գործառույթները և շարունակում եմ իրականացնել ում հետ ուզում է կապված լինի»,-վստահեցրեց Գևորգ Կոստանյանը: Իսկ դրանից առաջ լրագրողներից մեկի նույնաբովանդակ հարցին պատասխանելիս՝ հղում արեց վարչապետի մեկնաբանություններին, թե Սերժ Սարգսյանի ասածը վերաբերել է հարկային, տնտեսական ոլորտում Ծառուկյանի գործած հանցագործություններին: Մինչդեռ հայտնի ելույթում դրանք հստակ տարանջատված էին.
3. Տարիներ ի վեր շարունակում են օդում կախված մնալ չստուգված լուրերը չմուծված միլիարդավոր դրամ հարկերի, տարեցների կենսաթոշակներից ու երիտասարդների կրթվելու իրավունքից գողացված միլիարդները չնչին, այսպես ասած, «բարեգործության» անվան տակ քողարկելու մասին: Ես հորդորում եմ Հայաստանի Հանրապետության վարչապետին՝ հանձնարարել համապատասխան մարմիններին մինչև վերջ ու մանրամասն ստուգել այս լուրերի իսկությունը և բաց ներկայացնել բոլորին:
4. Շարունակում են նաև օդում կախված մնալ բազմաթիվ քրեական հանցագործություններ պրոֆեսիոնալ կերպով քողարկելու մեխանիզմ հիմնելու մասին չստուգված լուրերը: Վաղը ես հրավիրելու եմ Անվտանգության խորհրդի նիստ, որտեղ մեր իրավապահների հետ համապատասխան անդրադարձ կլինի, թե ինչպես վարվել նման լուրերի հետ»:
