Արտաշատ քաղաքում պաշտոնապես մեկնարկել է քաղաքապետի ընտրությունների քարոզարշավը: «Առաջին լրատվականը» տեղեկացրել էր, որ Արտաշատի մշակույթի կենտրոնում Ջոնիկ Աբրահամյանը ներկայացնում էր Արգամ Աբրահամյանին որպես հանրապետականների թեկնածու գաղտնի պայմաններում մշակույթի կենտրոնի սենյակներից մեկում: Թեև մեզ փորձում էին մշակույթի կենտրոնից դուրս հրավիրել՝ վստահեցնելով, որ նման հանդիպում չկա, և ո՛չ մարզպետը, ո՛չ քաղաքապետը, ո՛չ Ջոնիկ և Արգամ Աբրահամյանները չեն մասնակցում հավաքին, մեզ հաջողվեց զրուցել հանդիպման սենյակից դուրս եկող Արգամ Աբրահամյանի հետ: Նա վստահեցրեց, որ ընտրություններին մասնակցելու է քաղաքակիրթ ձևով. «Մենք բիրտ մեթոդների չենք դիմելու, արդար ընտրություն է լինելու… Որ ընտրակաշառք բաժանենք, դուք կիմանաք, նման մտադրություն չունենք»,- ասաց նա:
Անդրադառնալով իր մյուս թեկնածուի՝ Հովհաննես Ղազարյանի՝ Գազի Հովոյի թեկնածությանը՝ Արգամ Աբրահամյանն ասաց, որ նրան մրցակից է համարում. «Ով որ մասնակցում է, բոլորին էլ մրցակից եմ համարում»,- ասաց Արգամ Աբրահամյանը հորեղբոր՝ Ջոնիկ Աբրահամյանի հուշումից հետո:
Վարչապետ Հովիկ Աբրահամյանի որդին՝ Արտաշատի քաղաքապետի թեկնածու Արգամ Աբրահամյանը, ընտրական հանձնաժողով ներկայացրած եկամուտների հայտարարագրի համաձայն՝ այսօրվա դրությամբ 44 միլիոն դրամ և 75 հազար դոլար ունի։ Անդրադառնալով այն հարցին, որ մամուլում արդեն իսկ հրապարակվում է՝ հայտարարագրի մեջ ողջ ունեցվածքը նշված չէ, Արգամ Աբրահամյանն ասաց, որ ինչ կա, ներկայացրել է. «Հայտարարագրվել է իմ ունեցվածքն ամբողջությամբ, ինչ-որ իրանք ներկայացրել են, դրանք ավել բաներն են, իմ հետ կապ չունեն»:
Մանրամասները՝ տեսանյութում:
