«Մենք խոսում էինք, որ չէր կարելի նույն «ՀայՌուսգազարդ» ընկերության վերջին բաժնետոմսերն էլ հանձնել Ռուսաստանին: Եվ կարծում եմ, որ ժամանակին Հայաստանի էլեկտրական ցանցեր ընկերությունում էլ ՀՀ կառավարությունը պետք է գոնե 5 տոկոս բաժնեմաս պահեր: Մեր որոշ գործընկերներ բղավում էին, թե այդ 5 տոկոսն ինչ է տալու մեզ: Այդ 5 տոկոսը որոշակի վերահսկողական լիազորություն էր տալու»,- «Առաջին լրատվական»-ի հետ զրույցում ասում է ԱԺ պատգամավոր Խաչատուր Քոքոբելյանը՝ անդրադառնալով Հայաստանի էլեկտրական ցանցեր ընկերությանը և նրա կողմից էլեկտրաէներգիան թանկացնելու հայտին:
Պատգամավորը գտնում է, որ ՀԷՑ-ի վրա ազդեցություն գործելու հնարավորություն, գործիք ՀՀ կառավարությունն այսօր էլ ունի, պարզապես իշխանությունը պարտավոր է այն օգտագործել: «Իշխանությունը պետք է անկախ աուդիտորներ հրավիրեր, պետք է փորձաքննություն նշանակեր և եզրակացություններ աներ, թե որտե՞ղ են գտնվում այդ գումարները: Եվ ՀԷՑ-ում ինչպե՞ս է առաջացել 300 մլն դոլարի պարտքը: Կամ ինչպե՞ս են իրենց թույլ տալիս, որ այդ բեռը դնեն մեր քաղաքացիների ուսերին»,- հարցնում է Խ. Քոքոբելյանը:
Վերջինս գտնում է, որ էներգետիկ ոլորտում նման բարձիթողի և անվերահսկելի վիճակը մեր երկրում անվտանգության խնդիր է առաջացնում: Նրա խոսքերով՝ ՀՀ կառավարությունը պարտավոր է գործիքներ կիրառել և միջամտություն ունենալ ՀԷՑ-ի գործունեության մեջ:
«Չի կարելի Հայաստանի համար կենսական, անվտանգության նշանակություն ունեցող ընկերություններում թույլ տալ ստեղծելու այն իրավիճակը, որն այսօր ունենք: Եզրագծին գտնվող այնպիսի տնտեսվարողներ կան, որոնց արտադրության գնագոյացման մեջ հոսանքը կարևորագույն մաս է կազմում: Էլեկտրաէներգիայի թանկացման դեպքում այդ արտադրությունները պարզապես մրցունակ չեն լինի: Եվ չի բացառվում, որ տնտեսությունը հասնի կաթվածահար վիճակի»,- եզրակացնում է պատգամավորը:
Հարցազրույցն ամբողջությամբ՝ տեսանյութում:
